საუკეთესო სტენდი და საუკეთესო მარკეტინგული კამპანია- ამ ტიტულებით კორეის რესპუბლიკაში (სამხრეთ კორეა) საქართველოს ტურიზმის ეროვნული ადმინისტრაცია დაჯილდოვდა.

ქალაქ სეულში ტურისტული გამოფენა-ბაზრობა „KOTFA 2014” 29 მაისს-1 ივნისს გაიმართა. ტურიზმის ადმინისტრაციასთან ერთად გამოფენაში 6 ტურისტული კომპანია მონაწილეონდა: Travel Shop; Visit Georgia; Georgica Travel; Trawellin; Caucasus Travel; Tika Tours. სეულის საერთაშორისო ტურისტულ გამოფენაზე საქართველოს საპრეზენტაციო სტენდი იყო წარდგენილი, სადაც მიწვეული სტუმრები საქართველოს შესახებ ინფორმაციას გაეცნენ. გამოფენის მონაწილეებს, საქართველოს შესახებ კორეულ და ინგლისურ ენებზე დაბეჭდილი ბროშურები და რუკები დაურიგდათ. გამოფენაზე საქართველო დაჯილდოვდა, საუკეთესო სტენდის და საუკეთესო მარკეტინგული კამპანიის ტიტულით.

საქართველოს სტენდი ათასობით სტუმარმა დაათვალიერა. გამოფენის ფარგლებში, ოთხი დღის განმავლობაში, წამყვანი ტელეკომპანიების, რადიოსადგურების, ბეჭდური მედიის წარმომადგენებთან და სერვისის მომწოდებლებთან გაიმართა შეხვედრები. საქართველოს შესახებ რეიტინგული გამომცემლობა “Global Travel News” ვრცელ სტატიას ავრცელებს. სტატიების გამოქვეყნებას გეგმავენ: “Fortune Korea“ “The Korea Travel Times,” “Triple Travel People,” “Korea Tourism News,” “The transport and travel times,” “Baum Architects” და “Ab-Road.” „KOTFA 2014” მსოფლიოში ერთ-ერთი უდიდესი ტურისტული გამოფენა-ბაზრობაა. სეულის გამოფენას 59 ქვეყნის წარმომადგენელი, 120 ათასი სტუმარი დაესწრო.