ექსკლუზივი: გიორგი ჩხარტიშვილი (მაცაცო) - მე არ მითქვამს, რომ ახალაიას ადვოკატი არის ლგბტ

საზოგადოება - 19:01, 02 Jun, 2014

5400

ცნობილი ქართველი ტრანსგენდერი გიორგი ჩხარტიშვილი იგივე მაცაცო ბოლო დროს მისი სახელით გავრცელებულ ინფორმაციას დათა ახალაიას ადვოკატის ირაკლი ზაქარეიშვილის ლგბტ თემის წევრობისა და წარსულში ნასამართლეობის შესახებ სიცრუეს უწოდებს და ამბობს, რომ მის სახელით გარკვეული ადამიანები ბოროტად სარგებლობენ.

„რამოდენიმე დღეა საინფორმაციო სააგენტოების მეშვეობით გავრცელდა ჩემი სახელით გაკეთებული კომენტარი დათა ახალაიას ადვოკატის ირაკლი ზაქარეიშვილის ლგბტ თემის წევრობისა და წარსულში ნასამართლეობის შესახებ.

მინდა საზოგადოებას ვაცნობო და განვმარტო, რომ აღნიშული განცხადება არ არის ჩემს მიერ გაკეთებული და გავრცელებულია ჩემი სახელისა და გვარის გამოყენებით ჩემთან შეთანხმების გარეშე.

მე ვარ სრულიად თავისუფალი ადამიანი თავისუფალ სამყაროში, მე არასოდეს არ მოვერიდები მთავრობის ან პარლამენტის შემადგენლობაში გამოვავლინო და საჯაროდ დავასახელო ლგბტ თემის წევრები, რომლებსაც სახეზე ნიღბები აქვთ გაკეთებულები და როგორც თავის თავს, ისე ხალხსაც ატყუებენ, მაგრამ ამ კონკრეტულ შემთხვევაში ირაკლი ზაქარეიშვილთან მიმართებაში გავრცელებული ნიუსი არ წარმოადგენს ჩემს მიერ გაკეთებულ განცხადებას.

ამავდროულად მინდა ყველა მედია საშუალებას მოვუწოდო თავი შეიკავონ ისეთი გაცხადებების გავრცელებისაგან, რომელიც არ არის პირადად ჩემთან შეთანხმებული ან არ აქვთ მიღებული პირადად ჩემთან კომუნიკაციის შედეგად.
ვინაიდან ვარ საქართველოში ერთ-ერთი ცნობილი ლგბტ თემის წევრი, რომელიც ღიად საუბრობს და ისაუბრებს სხვადასხვა საზოგადოებისთვის მნიშვნელოვან საკითხებზე ჩემი "ფეისბუქის" გვერდი არაერთხელ გამხდარა კიბერ თავდასხმის მსხვერპლი.

შესაბამისად გთხოვთ მედიის საშუალებებმა პირადად ჩემთან სატელეფონო კომუნიკაციის გარეშე არ დაუშვან პროვოკაციული შინაარსის განცხადებების გავრცელება, რომელმაც შესაძლოა უარყოფითი შედეგები გამოიწვიოს“, - ამბობს ჩხარტიშვილი „ნიუპოსტთან“ საუბრისას.

აღნიშნული განცხადება 31 მაისს CP.ge- საშუალებით გავრცელდა, სადაც გიორგი ჩხარტიშვილი ამბობდა, რომ ''დათა ახალაიას ადვოკატი ნამდვილად არის გეი''.