გორის მუნიციპალიტეტის 25-მდე სოფელი მოსავლის გარეშე დარჩა (ფოტო)

საზოგადოება - 17:26, 02 Jun, 2014

4963

დაზარალებულ სოფლებში ასეთი ძლიერი სეტყვა ბოლო 20 წელია არ ახსოვთ თორტიზა, ხელთუბანი, სვენეთი, ბერბუკი, აძვი, რეხა, კირბალი. ეს არასრული ჩამონათვალია იმ სოფლებისა სადაც გუშინ საღამოს მოსულმა უხვმა ნალექმა და ძლიერმა სეტყვამ მოსავალი თითქმის ასი პროცენტით გაანადგურა.

როგორც ადგილობრივები "ნიუპოსტთან" საუბრისას აცხადებენ, მათ ბოლო ოცი წელია ასეთი ძლიერი სეტყვა არ ახსოვთ, მათივე თქმით სეტყვა ნახევარ საათზე მეტხანს გრძელდებოდა.

განადგურებულია სასოფლო სამეურნეო სავარგულები ვაშლის და ხეხილის ბაღები. დაზარალებულები ეჭვობენ, რომ მოსავალი არც მომავალ წელს არ ექნებთ.

დილიდან სტიქიის ზონაში არსებულ ვითარებას ადგილზე ეცნობიან ხელისუფლების წარმომადგენლები, გორის მუნიციპალიტეტის გამგებელი პაპუნა კობერიძე და გორის მაჟორიტარი დეპუტატი სოსო ვახტანგაშვილი.
მათი ინფორმაციით, დაზარალებულ მოსახლეობას ხელისუფლება დახმარებას გაუწევს. დღესვე სტიქიის შედეგად დაზარალებულ სოფელ რეხაში ჩავიდა სოფლის მეურნეობის მინისტრის პირველი მოადგილეც რომელმაც მხარის გუბერნატორთან ერთად ერთ-ერთი დაზარალებულის ბაღი დაათვალიერა.

"მდგომარეობა საკმაოდ მძიმეა, მობილურად ჩამოყალიბდა კომისია, რომელიც დაითვლის აღნიშნულ ზარალს. ასევე მოხდა ადამიანური რესურსების ძალის მობილიზება სხვადასხვა მეზობელი რეგიონებიდან ვინაიდან იმდენად მასშტაბურია ზარალი რომ, არსებული კადრებით შეუძლებელი იყო ამის შეფასება. ალბათ რამოდენიმე კვირა დაგვჭირდება, რომ მივიღოთ სრული სურათი, შესაბამისად, მიღებული იქნას თუ რა ზომები იქნას გატარებული აღნიშნული ზარალის დარეგულირებასთან დაკავშირებით", - აცხადებს ოთარ დანელია.

გიორგი ახალკაცი, გორი, "ნიუპოსტი"