რა კავშირშია 15 წლის გოგონას თვითმკვლელობასთან ზალდასტანიშვილის ამერიკული აკადემია

საზოგადოება - 16:29, 02 Jun, 2014

7593

რამდენიმე დღის წინ თბილისში შემზარავი ამბავი მოხდა, 15 წლის გოგონამ სიცოცხლე თვითმკვლელობით დაასრულა. ვრცელდებოდა ვერისა, რომ გოგონას თვითმკვლელობას დედა ქუჩაზე შეესწრო, ქალბატონმა ვერ გაუძლო განსაცდელს, ავიდა კორპუსში და თავდაც გადმოხტა მე-9 სართულიდან, თუმცა ის მეზობლის აივანზე დაეცა და გადარჩა.

თუმცა, როგორც ოჯახის ახლობლებმა ,,ნიუპოსტს“ განუცხადეს, დედა არათუ ქუჩაში, არამედ თავადაც სახლში იმყოფებოდა, როცა გოგონა მოწყვეტით აივანზე გაიქცა და გადახტა, რის შემდეგაც ის ადგილზე გარდაიცვალა, მხოლოდ ამის შემდეგ დედამაც თვითმკვლელობა სცადა, ისიც გადახტა, თუმცა საბედნიეროდ, მეზობლის აივანზე დაცემამ გადაარჩინა.

,,ნიუპოსტისთვის“ ცნობილი ხდება დამატებითი დეტალები, კერძოდ, გარდაცვლილი გოგონა, რომლის ვინაობასაც არ ვასახელებთ, გივი ზალდასტანიშვილის ამერიკულ აკადემიაში რამდენიმე ხნის გადასული იყო სხვა სკოლიდან. როგორც ,,ნიუპოსტს“ წყარომ განუცხადა, გოგონას დედა ე.ი. (ქალბატონის სახელსა და გვარსაც შეგნებულად არ ვასახელებთ), ზალდასტანიშვილის სკოლას საყვედურობს და ამბობს, რომ სწორედ ამ სკოლაში გადასვლის შემდეგ, გოგონას გაურკვეველი მიზეზებით ფსიქოლოგიური პრობლემები შეექმნა, რასაც ბავშვი ძალიან განიცდიდა. ახლობლების ინფორმაციით, გოგონა ძალიან მოწესრიგებული, მშვიდი და მეგობრული ბავშვი იყო, თუმცა მათთვისაც უცნობია, რატომ შეიცვალა გოგონა ამერიკულ აკადემიაში გადასვლის შემდეგ.

,,ნიუპოსტი“ შეეცადა ინფორმაციის გადამოწმებას გივი ზალდასტანიშვილის ამერიკულ აკადემიაში. სკოლაში ადასტურებენ, რომ გარდაცვლილი გოგონა ამერიკული აკადემიის მოსწავლე იყო, თუმცა, გარდაცვლილი არასრულწლოვანისა და მისი ოჯახის ინტერესებიდან გამომდინარე, დეტალებზე საუბრისგან თავს იკავებენ.