მთავარ პროკურატურასთან ემზარ კვიციანის ახლობლები და ოჯახის წევრები აქციას მართავენ. ისინი კვიციანის წინასწარი პატიმრობიდან გათავისუფლებას ითხოვენ.

კვიციანის დის, ლალი კვიციანის განცხადებით, მისი ძმა უკვე მეოთხე თვეა ყოველგვარი საფუძვლის გარეშეა დაპატიმრებული.

"სამართლიანობა უნდა აღდგეს, ჩვენ ვაპროტესტებთ სასამართლოსა და პროკურატურის ქმედებებს, რომლის შედეგად, უკვე მეოთხე თვეა, ჩემი ძმა ყოველგვარი საფუძვლის გარეშე იმყოფება საპატიმროში. იგი საქართველოში 28 თებერვალს ჩამოვიდა და მას შემდეგ ციხიდან არ უშვებენ. უკვე ორჯერ გადაუვადეს პატიმრობა", - განაცხადა ლალი კვიციანმა.

აქციას საქართველოს თავდაცვის ყოფილი მინისტრი დავით თევზაძეც შეუერთდა:

"ჩვენ დღეს არ ვდავობთ იმაზე, გვჯერა თუ არა წარდგენილი ბრალდებების, ამას სასამართლო გაარკვევს. მაგრამ სასამართლოს გადაწყვეტილებამდე ეს კაცი ციხეში არ უნდა იყოს. სწორედ ეს არის უსამართლობა. თუკი სამართლიანობა არ აღდგება, ჩვენ გაჩერებას არ ვაპირებთ, ეს არის ანონსი," - განაცხადა დავით თევზაძემ.