უკანონო აბორტებზე სისხლის სამართლის პასუხისმგებლობა მკაცრდება. "სისხლის სამართლის კოდექსში" შესატანი ცვლილებები, რომელიც პარლამენტში უკვე ინიცირებულია ჯანდაცვის კომიტეტის თავმჯდომარემ დიმიტრი ხუნდაძემ და მისმა მოადგილემ მირიან წიკლაურმა მოამზადეს.

ახალი კანონპროექტის მიხედვით, უკანონო აბორტი დაისჯება საზოგადოებისათვის სასარგებლო შრომით ვადით 120-დან 300-საათამდე, ან თავისუფლების აღკვეთით ვადით 1-დან 2-წლამდე, ხოლო იგივე ქმედება ჩადენილი განმეორებით – თავისუფლების აღკვეთით ვადით 2-დან 4-წლამდე, საქმიანობის უფლების ჩამორთმევით ვადით 3-წლამდე.

ნორმები მკაცრდება იმ შეთხვევებშიც, როცა უკანონო აბორტი გამოიწვევს სიცოცხლის მოსპობას. აღნიშნული ისჯება თავისუფლების აღკვეთით ვადით 4-დან 6-წლამდე, საქმიანობის უფლების ჩამორთმევით ვადით 3-წლამდე.

აბორტების თემაზე პარლამენტში კიდევ ერთი პროექტია წარდგენილი. "ჯანმრთელობის დაცვის შესახებ" კანონში დაგეგმილი ცვლილებების მიხედვით, ორსულობის ხელოვნური შეწყვეტის მიზნით, სამედიცინო ჩარევის განხორციელებამდე 3-დღიანი მოსაფიქრებელი პერიოდი 5-დღემდე იზრდება.

კანონპროექტების განხილვის პროცესი პარლამენტში ივნისიდან დაიწყება.