,,რეფორმატორთა კლუბი“ გარდაბანში მომხდარ ფაქტს ეხმაურება და ხელისუფლებას მკაცრი რეაგირებისკენ მოუწოდებს.

,,გუშინ გარდაბანში ბოლო 11 წლის მანძილზე პირველად მოხდა დაპირისპირება ეთნიკურ ნიადაგზე. ,,რეფორმატორთა კლუბი” მოუწოდებს ხელისუფლებას მკაცრად და დროულად მოახდინოს რეაგირება ამ საზარელ ფაქტზე. ის რაც გარდაბანში მოხდა, არის იმ სიძულვილის შედეგი, რომელიც ხელისუფლების უნიათობითა და წაქეზებით მძვინვარებს საქართველოში. მთავრობამ გახსნა პანდორას ყუთი და ძალიან ცდება ის, ვინც ფიქრობს, რომ ძალადობა გაჩერდება ნაც.მოძრაობის წევრებზე ან აზერბაიჯანელებზე ან საზოგადოების სხვა კონკრეტულ სეგმენტზე. თუ ძალადობას არ გაეცემა დროული და ადეკვატური პასუხი, ის შევა ყველა ოჯახში, ისევე როგორც 90-იანი წლების დასაწყისში...“, - ნათქვამია ,,რეფორმატორთა კლუბის“ განცხადებაში.

გარდაბანში რამდენიმე ათეული ადამიანი ერთმანეთს ფიზიკურად დაუპირისპირდა.

გავრცელებული ინფორმაციით, დაპირისპირება ,,ნაციონალური მოძრაობისა" და ,,ქართული ოცნების" წევრებსა და აქტივისტებს შორის მოხდა.

ვითარების განმუხტვას თავდაპირველად პოლიცია ცდილობდა, მოგვიანებით კი სპეცდანიშნულების რაზმი ჩარევა გახდა საჭირო.

შინაგან საქმეთა სამინისტრომ გარდაბანში მომხდარ ინციდენტზე გამოძიება დაიწყო. უწყებაში განმარტავენ, რომ საქმე სისხლის სამართლის კოდექსის 239 მუხლის პირველი ნაწილით, ხულიგნობის მუხლით არის აღძრული.