საქართველოს კათოლიკოს-პატრიარქმა მოსახლეობას სიმშვიდის შენარჩუნებისკენ მოუწოდა.

უწმინდესმა ქადაგებისას სიხარულისა და სიყვარულის მნიშვნელობაზე ისაუბრა.

“ჩვენ ყველაზე მეტად იმაზე ვფიქრობთ, რა აკლია კაცობრიობას. ზოგი მხოლოდ მატერიალურზე ფიქრობს, ზოგი სულიერებაზე. ყველაზე მეტად კი, ჩემი აზრით, კაცობრიობას სიმშვიდე და სიხარული აკლია. ყველას გეძლევათ ლოცვა-კურთხევა, რომ სიმშვიდე შეინარჩუნოთ თქვენს გულში, სულში. შევთხოვთ უფალს, რომ სიმშვიდე და მშვიდობა მოგვცეს. სიმშვიდე თუ იქნება, უფალიც ჩვენთან იქნება. როცა ადამიანში არის სიმშვიდე, არის სიხარული და სიყვარული. უფალი მიდის იმ ადამიანის გულში, რომელსაც სხვა ადამიანები უყვარს. ამიტომ, ეცადეთ, სიმშვიდე სუფევდეს თქვენში და თქვენს სახლებში. გეძლევათ ლოცვა-კურთხევა, რომ ხმამაღალი სიტყვა არ იყოს თქვენს სახლებში. თუ ვინმე ხმას აუწევს, თქვენ ხმამაღლა ნუ უპასუხებთ. ეცადეთ, ეს წესი დაინერგოს თქვენს ოჯახებში. სადაც არის სიყვარული, იქ სიხარულია“, - ბრძანა საქართველოს კათოლიკოს-პატრიარქმა.

ილია მეორემ ქადაგებისას ამაღლების დღესასწაულის მნიშვნელობაზეც ისაუბრა.

„ყველას გილოცავთ ამაღლების დღესასწაულს. 40 დღის განმავლობაში მაცხოვარი ეცხადებოდა მოციქულებს და მოძღვრავდა მათ და ყოველი გამოცხადების დროს ეუბნებოდა, მშვიდობა თქვენდა. როცა ჩვენ ვამბობთ, „ჩვენთან არს ღმერთი“, ამით ჩვენ ვამბობთ, რომ გვწამს უფლის სიტყვები - „მე თქვენთანა ვარ“ და მადლობა უფალს, რომ ჩვენთანაა. როცა მაცხოვარმა ამაღლების დღეს მოციქულები ბეთანიამდე წაიყვანა, ხელები ზეცისკენ აღაპყრო და ამაღლება დაიწყო, მან უთხრა მოციქულებს - „მე თქვენთანა ვარ, ვიდრე აღსასრულამდე უფლისა“ და მოციქულები იერუსალიმში დიდი სიხარულით დაბრუნდნენ“, - ბრძანა უწმინდესმა.