მონაცემთა ბაზაში 3 271 ამომრჩევლის გაორების შემთხვევა გამოვლინდა

საზოგადოება - 14:21, 28 May, 2014

645

სახელმწიფო სერვისების განვითარების სააგენტოს მონაცემთა ბაზაში 3 271 გაორების არსებობა დადასტურდა და შესაბამისი შემთხვევები აღმოიფხვრა.

იუსტიციის მინისტრმა თეა წულუკიანმა ამომრჩეველთა ელექტრონულ სიებში გაორებების აღმოფხვრის პროექტის შედეგები საზოგადოებას დღეს გააცნო.

წულუკიანი აცხადებს, რომ პროექტის ფარგლებში იუსტიციის სამინისტროს სახელმწიფო სერვისების განვითარების სააგენტოს თანამშრომლებმა 4 348 919 საქმე შეისწავლეს და ფოტოსაძიებო სისტემების გამოყენებით სავარაუდოდ მსგავსი ჩანაწერები გამოავლინეს.

სავარაუდო გაორებები 9 595 დოკუმენტში აღმოჩნდა, რის შემდეგაც ისინი სახელმწიფო სერვისების განვითარების სააგენტოს ტერიტორიულ სამსახურებში გადაიგზავნა. საბოლოოდ 5 537 მონაცემში გაორება არ დადასტურდა. გასწორდა არასწორად მიბმული 787 ფოტოსურათი. გაორება აღმოიფხვრა და ერთი დოკუმენტი 3 271 შემთხვევაში გაუქმდა.

მინისტრის თქმით, მოქალაქეების ნაწილმა, რომლებსაც ერთზე მეტი პირადობის დამადასტურებელი მოწმობა აღმოაჩნდათ, ისარგებლეს პარლამენტის მიერ გამოცხადებული ამნისტიით, რომელიც პირადი მონაცემების გაყალბებას ეხება და 2014 წლის ბოლომდე მოქმედებს.

"ჩვენ, რამდენიმე თვეა ვასრულებთ დაპირებას "ერთი ამომრჩეველი - ერთი ხმა" და 15 ივნისს საქართველოს პირველად ექნება ფოტოსურათებიანი საარჩევნო სია. ეს ერთხელ და სამუდამოდ გამორიცხავს იმას, რომ სახელმწიფო სისტემის გარეთ, სარდაფებში, თუ სხვაგან დაბეჭდილი პირადობის მოწმობები ვინმემ საარჩევნოდ გამოიყენოს. ეს ასევე გამორიცხავს იმას, რომ ერთმა ადამიანმა ორ ან მეტ ადგილას სცადოს ხმის მიცემა", - განაცხადა ბრიფინგზე თეა წულუკიანმა.

მინისტრის თქმით, თუკი ბიომეტრიული საარჩევნო სიის შედგენა, რაც ამ ეტაპზე ვერ მოხერხდა, რამდენიმე მილიონი ლარი დაჯდებოდა, აღნიშნული პროექტის განხორციელებისათვის 885 000 ლარი დაიხარჯა.

წულუკიანი აღნიშნავს, რომ პროექტი მთლიანად სერვისების განვითარების სააგენტოს შემოსავლებით დაფინანსდა.

სერვისების განვითარების სააგენტო პირველი ივნისისათვის ცენტრალურ საარჩევნო კომისიას საბოლოო მონაცემებს საარჩევნო უფლების მქონე პირებთან დაკავშირებით გადასცემს.