ცენტრალური საარჩევნო კომისია 26 მაისს მედია საშუალებებში გავრცელებულ განცხადებას ეხმაურება, რომლის მიხედვითაც ერთ-ერთი საარჩევნო სუბიექტი ცესკოსგან საზოგადოებრივი აზრის კვლევის წარმოებას, დებატებში მონაწილეობის უფლებასა და შესაბამისი საეთერო დროის დათმობას მოითხოვს.

საარჩევნო ადმინისტრაცია ცალსახად განმარტავს, რომ აღნიშნული მოთხოვნა სცილდება საარჩევნო ადმინისტრაციის კანონით დადგენილ კომპეტენციებს. საარჩევნო პროცესებში მედიის მონაწილეობას და მისი გამოყენების წესს განსაზღვრავს საქართველოს კომუნიკაციების ეროვნული კომისია, რომელიც ასევე, უზრუნველყოფს მაუწყებლების მიერ კანონით დადგენილი ნორმების დაცვის მონიტორინგს და ახდენს შესაბამის რეაგირებას (საარჩევნო კოდექსის 51-ე მუხლის მე-15 პუნქტი).

ამასთან, წინასაარჩევნო კამპანიის ეთერში გაშუქების შემთხვევაში, წინასაარჩევნო დებატების არადისკრიმინაციულად და შესაბამისი კვალიფიციური საარჩევნო სუბიექტის მონაწილეობით წარმოებაზე ვალდებულება ეკისრება საერთო მაუწყებელს, რომელიც კვალიფიციურ სუბიექტებს განსაზღვრავს საარჩევნო კოდექსის 51-ე მუხლის მე-4 პუნქტის შესაბამისად.

აღსანიშნავია, რომ საზოგადოებრივი აზრის კვლევის შედეგებით პოლიტიკური პარტიის კვალიფიციურ საარჩევნო სუბიექტად აღიარება ასევე, წარმოადგენს მაუწყებლის უფლებამოსილებას. აღნიშნული უფლებამოსილების რეალიზების შემთხვევაში მაუწყებელმა უნდა გაითვალისწინოს, რომ კვლევა ჩატარებულია საარჩევნო კოდექსის მოთხოვნების დაცვით (საარჩევნო კოდექსის 51-ე მუხლის მე-8 და-11 პუნქტები). დამატებით განვმარტავთ, რომ საარჩევნო კანონმდებლობა განსაზღვრავს მხოლოდ საზოგადოებრივი აზრის კვლევის ჩატარების პირობებს და არ ადგენს ასეთი კვლევის ჩატარების ვალდებულებას რომელიმე ინსტიტუციის მიმართ.

დასასრულს, აღვნიშნავთ, რომ ცესკო გამოთქვამს სრულ მზადყოფნას, მჭიდროდ ითანამშრომლოს არჩევნებში ჩართულ მხარეებთან, კანონმდებლობით მინიჭებული უფლებამოსილების ფარგლებში.