მავთულხლართების მიღმა დარჩენილი ვანიშვილები შველას ითხოვენ

საზოგადოება - 16:58, 27 May, 2014

981

სოფელ ხურვალეთის მკვიდრი დავით ვანიშვილი, რომლის საცხოვრებელი სახლიც ოკუპირებულ ტერიტორიაზე მოექცა დახმარებას ითხოვს. იგი მავთულხლართების მიღმა მეუღლესთან და შვილიშვილთან ერთად ცხოვრობს. მისი თქმით, მას შემდეგ, რაც ისინი ოკუპირებულ ტერიტორიაზე აღმოჩნდნენ რუსი ოკუპანტები მათზე ზეწოლას სისტემატიურად ახდენენ.

როგორც დავით ვანიშვილი ამბობს, რუსი ძალოვანები ქართველებთან მიახლოვებასაც კი უკრძალავენ და ემუქრებიან.

ვანიშვილმა აღნიშნულის შესახებ ხურვალეთში ჩასულ პარლამენტის საგარეო ურთიერთობათა კომიტეტეტის თავმჯდომარეს თედო ჯაფარიძესაც უამბო და დახმარება სთხოვა.

”რუსბი მეუბნევიან ქართველები, რომ მოდიან ნუ ელაპარაკებიო, ახლოს არ მიხვიდეო. პატიმარივით ვარ, სროკი არ მაქვს ერთი ეგ არის, თორემ ნამდვილი პატიმარი ვარ. არც იქით მიშვებენ არც აქეთ. დღეში სამჯერ მაინც მოდიან ჯარისკაცები და მამოწმებენ სახლში ვარ თუ არა, დამეხმაროს ვინმე ძალიან ცუდ მდგომარეობაში ვართ", - ამბობს მავთულხლართების მიღმა დარჩენილი დავით ვანიშვილი.

პარლამენტის საგარეო ურთიერთობათა კომიტეტეტის თავმჯდომარე თედო ჯაფარიძე ამბობს, რომ სოფელში მძიმე ვითარება დახვდა და იგი ხურვალეთში არსებული მდგომარეობის შესახებ ინფორმაციას ვილნიუსში ხვალ დაგეგმილ, ნატოს საპარლამენტო ასამბლეაზე კოლეგებს გააცნობს.

"ხვალ მე მივემგზავრები ვილნიუსში, სადაც გაიმართება ნატოს საპარლამენტო ასამბლეა, ესეც განსაკუთრებული მოვლენაა ვინაიდან ეს იქნება ბოლო ამგვარი ფორუმი, რომელიც ნატოს სამიტის წინ გაიმართება. მე რაღაცნაირად ვგრძნობდი, რომ მჭირდება დამატებითი მუხტი რომ, ეს ყველაფერი მენახა და შეძლებისდაგვარად ჩემი ემოციები, რაც მე ვნახე იქ გადამეცა ჩემი კოლეგებისთვის, რომლებსაც შევხვდები ვილნიუსში",- ამბობს ჯაფარიძე.

გიორგი ახალკაცი "ნიუპოსტი" გორი