საქართველოში მეწყერის რისკის მატარებელი 300-მდე ადგილი არსებობს, მათ შორისაა თბილისიც. სპეციალისტების განცხადებით, მეწყერის რისკის მატარებელი 10 ადგილი დედაქლაქშია. საქართველოს მწვანეთა მოძრაობა „დედამიწის მეგობრების“ თანათავმჯდომარე ნინო ჩხობაძე, იმ რისკებზე საუბრობს, რომელსაც ეს ტერიტორიები სპეციალისტების მუდმივი მონიტორინგისა და შესწავლის გარეშე ატარებენ. ჩხობაძე ამის შესახებ „პირველ რადიოსთან“ აკეთებს კომენტარს.

მისი თქმით, აუცილებელია პრევენციული ღონისძიებების გატარება, რაც მეწყერის რისკებს შეამცირებს. ნინო ჩხობაძის განცხადებით, დღეისათვის მეწყერსაშიში ზონების არსებული მონიტორინგი არ არის საკმარისი და აუცილებელია დამატებითი მექანიზმების ჩართვა.

„მეწყერის რისკის მატარებელი 10 ადგილი დედაქლაქშია. მათ შორის მტაწმინდის მშრალი მეწყერი, რომელიც 2003 წელს ჩამოინგრა და სამი ადამიანი ჩაიყოლა. მუხათგვერდის სასაფლაო, კონიაკის დასახლება, ცირკის მიდამოები და ასე შემდეგ.

ნებისმიერი ასეთი ტერიტორია თუ არ იქნება მოვლილი და მუდმივი მონიტორინგის ქვეშ,მისი ჩამონგრევის საფრთხე მუდმივად არსებობს. დღეს არსებული დაფინანსების გათვალისწინებით, ყველა ეს ტერიტორია მონიტორინგის ქვეშაა, თუმცა ეს არ არის საკმარისი. ამიტომ მნიშვნელოვანია,რომ თვითმმართველობებმა გაითვალისწინონ ყველა ის მონაცემი, რომელსაც მათ მიაწვდით გარემოს დაცვის სამინისტრო და მუდმივად თვითონვე განახორციელონ ასეთი ტერიტორიების მონიტორინგი.

ასევე მეწყერის ყველაზე მარტივი პრევენციაა ტყის ჩეხვის შენელება. გარდა სახელმწიფოს სიფრთხილისა და მუშაობისა, მსგავს შემთხვევებთან მოსახლეობაც უნდა იყოს ძალიან კორექტული. როდესაც მას ეუბნებიან , რომ ამა თუ იმ ტერიტორიაზე სახლის აშენება დაუშვებელია, ზუსტად მეწყერის ქვემოთ სახლი არ უნდა ააშენოს. ასევე სიფრთხილე მართებთ მშენებლებასა და ინვესტორებს. სამწუხაროდ ყველა ტერიტორიას მშენებლობის ნებართვა არ სჭირდება, ამიტომ მშენებლობის ადგილას ყოველთვის არ არის ჩაებული გეოლოგიური დასკვნა. კიდევ ერთი პრობლემა ის არის, რომ როგრც წესი ჩვენი მშენებლები, რომელებიც აშენებენ თბილისში გეოლოგიურ დასკვნებს არ ითვალისწინებენ, არა და საფრთხეები საკმაოდ სერიოზულია,“-განაცხადა ნინო ჩხობაძემ.