ამ საქველმოქმედო კონცერტზე იქნებიან ბავშვები, რომლებსაც ყველაზე მეტად სჭირდებათ საზოგადოების ყურადღება და სიყვარული. ბავშვები, რომლებიც იძულებულები არიან გაექცნენ რეალობას და თავიანთ სამყაროში ჩაიკეტნონ. ბავშვები, რომლებიც ამ თანადგომით სითბოსთან ერთად, ცოტა ხნით მაინც უკეთესი ცხოვრების შანსს მიიღებენ... ამიტომ გავერთიანდეთ ნინო ქათამაძისა და ნინო ქადაგიძე-ჟვანიას ინიციატივით გამართულ კონცერტზე და ვიბრძოლოთ ბავშვების გადასარჩენად.

საქველმოქმედო კონცერტს ნინო ქათამაძე 5 ივნისს, „უჩინარი ბავშვების“ დასახმარებლად მართავს. გალა კონცერტი - ,,ჩვენ სიყვარული გადაგვარჩენს" 19:00 საათზე „შერატონ მეტეხი პალასში“გაიმართება. კონცერტში აგრეთვე, მონაწილეობას მიიღებენ ნიკოლოზ რაჭველი, ევგენი მიქელაძის სახელობის ორკესტრი და „ჯორჯიან ბრასი“.

შემოსული თანხა სრულად გადაირიცხება საქველმოქმედო ორგანიზაციაში „პირველი ნაბიჯი საქართველო“, რომელიც ნინო ქადაგიძე-ჟვანიას მიერ დაფუძნებული ორგანიზაციაა და უკვე 15 წელიწადზე მეტია ემსახურება შეზღუდული შესაძლებლობის მქონე ბავშვთა გადარჩენას.

ნინო ჟვანია, „პირველი ნაბიჯი საქართველოს“ დამფუძნებელი:

ამ ბავშვებს ხშირად „უჩინარ ბავშვებს“ ვეძახით, რადგან ისინი ძირითადად საზოგადოებისაგან იზოლირებულად ცხოვრობენ და სახლებიდან ვერ გამოდიან. არ არიან ჩართულები ინკლუზიურ საგანმანათლებლო პროცესში, ვერ დადიან ბაღებსა თუ დღის ცენტრებში, ვერ ხერხდება მათი სოციალური ინტეგრაცია. უმეტეს შემთხვევაში ასეთი ბავშვები დედისამარა არიან დარჩენილნი. ჩვენ 2007 წლიდან დღემდე 114 ბენეფიციარს მოვემსახურეთ. აქედან 21 ბავშვი ჩვენი სპეციალისტების დაუღალავი და ეფექტური შრომის შედეგად უკვე სწავლობს საჯარო სკოლაში, დღის ცენტრსა და საბავშვო ბაღში. ეს შეიძლება სათქმელად ძალიან მარტივად ჟღერდეს, მაგრამ მართლაც, დიდი შრომისა და ძალისხმევის შედეგია“.