"საზოგადოებრივი მაუწყებლის" მეორე არხის ეთერში ასოცირების ხელშეკრულების შესახებ მომზადებული რეპორტაჟები, საინფორმაციო ვიდეორგოლები და ფილმები 5 ენაზე გავა.

საინფორმაციო პროექტი აფხაზურ, ოსურ, სომხურ, აზერბაიჯანულ და რუსულ ენებზე მომზადდება.

პროექტი მიზნად ისახავს საქართველოს ტერიტორიაზე მცხოვრები ეთნიკური უმცირესობებისთვის ევროკავშირთან ასოცირების ხელშეკრულების შესახებ მაქსიმალური ინფორმაციის მიწოდებას.

მაუწყებლის პროექტის დეტალები გიორგი ბარათაშვილმა დღეს ეთნიკური უმცირესობების საკითხებში საქართველოს პრეზიდენტის მრჩეველს სოფო შამანიდს გააცნო.

"ერთ-ერთი ნაკლოვანება, რომელზეც ეროვნული უმცირესობების საკითხებზე მომუშავე საერთაშორისო ორგანიზაციები მიგვითითებენ, არის ეროვნული უმცირესობებით კომპაქტურად დასახლებულ რეგიონებში ინფორმირებულობის, დაბალი, არასათანადო დონე, ამ ხარვეზის აღმოსაფხვრელად პრეზიდენტის ადმინისტრაციის ეგიდით და ხელშეწყობით, „საზოგადოებრივი მაუწყებელი“ და "დიალოგისა და განვითარების ფონდი", მოამზადებენ სპეციალურ სიუჟეტებს, რომელიც შეეხება ევროინტეგრაციას, ზოგადად ევროპულ ღირებულებებს, ასოცირების ხელშეკრულების მნიშვნელობას, რა სიკეთეს მოუტანს ასოცირების ხელშეკრულების ხელმოწერა ამ კონკრეტულ რეგიონებს",- განაცხდა სოფო შამანიდმა.