სოფლის მეურნეობის სამინისტრო მექანიზატორთა გადამზადების პროგრამას იწყებს.

ბიზნესი & ეკონომიკა - 17:59, 11 Dec, 2012

471

შეხვედრას სოფლის მეურნეობის მინისტრის მოადგილე შალვა ფიფია, სოფლის მეურნეობის განვითარების დეპარტამენტის უფროსი კონსტანტინე ხუცაიძე, გაერო-ს განვითარების პროგრამისა (UNDP) და შპს "მექანიზატორის" წარმომადგენლები, ასევე საქართველოს მასშტაბით არსებული პროფესიული კოლეჯების ხელმძღვანელები ესწრებოდნენ.

,,პროგრამის ფარგლებში ახალციხის, კაჭრეთის, ქობულეთის, სენაკის, გორის, დიდი ჯიხაიშის და ოზურგეთის პროფესიულ კოლეჯში 500 - 570 მემანქანე-ოპერატორი პროფესიული გადამზადების კურსს გაივლის. ეს საშუალებას მოგვცემს, მომზადებული შევხვდეთ საგაზაფხულო სასოფლოს-სამეურნეო სამუშაოების დაწყებას", - განაცხადა სოფლის მეურნეობის მინისტრის მოადგილემ შალვა ფიფიამ.

მისი განცხადებით, იგეგმება დიდი ოდენობით თანამედროვე ტრაქტორისა და სასოფლო-სამეურნეო დანიშნულების ტექნიკის შემოყვანა.

აღნიშნულ პროგრამას სოფლის მეურნეობის სამინისტრო, გაერო-ს განვითარების პროგრამასა და შპს "მექანიზატორთან" ერთად ახორციელებს.

სამინისტროსვე ინფორმაციით, პროფესიული კოლეჯების ხელმძღვანელები სამინისტროს ინიციატივას დადებითად აფასებენ და მზად არიან, აქტიურად ჩაერთონ ყველა ღონისძიებაში, რაც სოფლის მეურნეობის დარგის განვითარებას შეუწყობს ხელს.