საოცარი სანახაობა ხელოვნების სასახლეში, სასახლის კედლებზე აღმოჩენილი უძველესი მხატვრობის ფრაგმენტებითა და კოსტუმირებული მეჯლისით.

17 მაისს სასახლეში საზეიმოდ გაიხსნება ახლად რესტავრირებული რვა საგამოფენო და ისტორიული დარბაზი. რეაბილიტაციის პროცესი ამერიკის შეერთებული შტატების საელჩომ დააფინანსა. რეაბილიტაციის პერიოდში სასახლის კედლებზე აღმოჩენილია უძველესი მხატვრობის ფრაგმენტები, რომლის მეშვეობითაც მხატვარ-რესტავრატორებმა შეძლეს საგამოფენო დარბაზებისთვის მისი პირვანდელი სახე დაებრუნებინათ.

აღდგენილია დავით არსენიშვილის, რევაზ ლაღიძის, ჯორჯ ბალანჩინის, თეატრალური და სვეტებიანი დარბაზი, ასევე დამთვარიელებელს ელოდება კოლხი მედეას და ოქროს ვერძის ოთახები.

სასახლის სვეტებიან და თეატრის საგამოფენო სივრცეში განთავსდება მუზეუმის ფონდებში დაცული თეატრის უნიკალური ისტორიის ამსახველი ექსპონატები: კოსტიუმები, მემორიალური ნივთები, პარტიტურები, ხელნაწერები, აფიშები, ფოტოები, ასევე ცნობილი ქართველი მხატვრების პ.ოცხელის, გ. გაბაშვილის, ს. ქობულაძის, ელ. ახვლედიანის, ი. გამრეკელის, კ. ზდანევიჩისა და სხვათა გრაფიკული და ფერწერული ტილოები.

რევაზ ლაღიძის საგამოფენო დარბაზში სხვა ექსპონატებთან ერთად იხილავთ მის მემორიალურ როიალს, რომელზეც პირველად შეიქმნა პოპულარული ქართული სიმღერა ,,თბილისო”.

სასახლის პირველ სართულზე ჯორჯ ბალანჩინის დარბაზში, თბილისის ზ.ფალიაშვილის სახელობის ოპერისა და ბალეტის სახელმწიფო აკადემიური თეატრის მხარდაჭერით გაიმართება ”ნიუ-იორკ სითი ბალეს’” ფოტოგრაფის პაულ კოლნიკის ნამუშევრების პრეზენტაცია, რომელიც ეძღვნება ბალანჩინის ცხოვრებასა და შემოქმედებით მოღვაწეობას. ღონისძიებას განსაკუთრებულ ელფერს შესძენს თბილისის მოზარდმაყურებელთა თეატრის მიერ, სპეციალურად ამ დღისთვის შექმნილი კოსტუმირებული მეჯლისი.

წყარო: /info9.ge/