სასჯელაღსრულების დეპარტამენტის სამმართველოს უფროსის მოადგილემ გიორგი ყავლაშვილმა გადადგომის შესახებ პატაკი თავად დაწერა. ამის შესახებ „ქრონიკასთან“ სატელეფონო საუბარში ყავლაშვილმა განაცხადა. მისი თქმით აღნიშნული გადაწყვეტილება მის მიმართ გაჩენილი კითხვებიდან გამომდინარე მიღო.

„ჩემს მიმართ გაჩენილი კითხვებიდან და მაღალი საზოგადოებრივი ინტერესებიდან გამომდინარე გუშინ მივიღე გადაწყვეტილება, რომ დამეწერა პატაკი და დამეტოვებინა დაკავებული თანამდებობა“, - განაცხადა ყავლაშვილმა.

რამდენიმე დღის წინ სასჯელაღსრულების სამინისტროს თანამშრომლების მიერ სოლიდური პრემიების აღების ფაქტზე ინფორმაცია გავრცელდა. როგორც სასჯელაღსრულების მინისტრი სოზარ სუბარი განმარტავს, მან პრემიების შესახებ არაფერი იცოდა.