აჭარის ავტონომიური რესპუბლიკის მთავრობის თავმჯდომარე არჩილ ხაბაძე, აჭარის ავტონომიური რესპუბლიკის ჯანმრთელობისა და სოციალური დაცვის მინისტრი ნუგზარ სურმანიძე და აჭარის ავტონომიური რესპუბლიკის ფინანსთა და ეკონომიკის მინისტრი დავით ბალაძე დღეს ქ. ბათუმის რესპუბლიკურ კლინიკურ საავადმყოფოში იმყოფებოდნენ. მთავრობის წევრებმა შეხვედრა გამართეს სამედიცინო პერსონალთან და ინფორმაცია მიაწოდეს რესპუბლიკური საავადმყოფოს მშენებლობის შესახებ.

საავადმყოფოს მშენებლობა დაიწყება 2014 წლის მეორე ნახევარში. პროექტის პირველადი მონაცემებით ახალი შენობა 160 საწოლიანი იქნება. პოლიკლინიკური ბლოკი ყოველდღიურად 800 ამბულატორიულ პაციენტზე იქნება გათვლილი. სამედიცინო დაწესებულება მრავალპროფილური იქნება და მას საუნივერსიტეტო კლინიკის ფუნქციაც მიენიჭება. მოემსახურება როგორც მოზრდილ მოსახლეობას, ასევე ბავშვებს. კლინიკა აშენდება თანამედროვე სტანდარტების შესაბამისად, აღიჭურვება უახლესი სამედიცინო აპარატურით.

პროექტი მომზადებულია საქართველოს ჯანდაცვის სამინისტროს მიერ და მიმდინარეობს მისი ექსპერტიზა. მშენებლობის პირველ ეტაპს დააფინანსებს აჭარის მთავრობა, 2015 წლიდან პროცესში ჩაერთვება საქართველოს მთავრობა. მშენებლობა და აღჭურვა 24 თვის განმავლობაში დასრულდება.

ახალი საავადმყოფოს მშენებლობა უზრუნველყოფს მოსახლეობისათვის უწყვეტ სამედიცინო მომსახურების მიწოდებას, ასევე სამედიცინო პერსონალისათვის შეიქმნება ნორმალური სამუშაო პირობები.

ბათუმის რესპუბლიკური კლინიკური საავადმყოფო საუკუნოვანი ისტორიის და ტრადიების მქონე სამედიცინო დაწესებულებაა. იგი აშენებულია ექიმთა საზოგადოების ინიციატივით.