ამ ძალიან მნიშვნელოვან პროექტზე ეროვნული ბიბლიოთეკის მმართველი გიორგი კეკელიძე წერს.

როგორც ირკვევა დაიწყო პროექტის, „საჯარო ბიბლიოთეკები ადგილობრივი განვითარებისთვის“ განხორციელება. საპილოტე პროექტი 4 საჯარო ბიბლიოთეკაში – კერძოდ, ნუკრიანში, ხიდისთავში, ზუგდიდსა და ხულოში განხორციელდება.

გიორგი კეკელიძე, ეროვნული ბიბლიოთეკის მმართველი: „პროექტის მიზანია თანამედროვე ტექნოლოგიებით აღჭურვილი საზოგადოებრივი ცენტრების შექმნა საქართველოში, არსებული რეგიონული და სოფლის ბიბლიოთეკების ბაზაზე. ვფიქრობ, ეს რაიონული თუ სოფლის ბიბლიოთეკების გადარჩენის ერთადერთი სწორი გზაა“.

გიორგი კეკელიძის მიერ, სოციალურ ქსელში განთავსებულ განცხადებას მედია ექსპერტი ია ანთაძე გამოეხმაურა:

ია ანთაძე: „ქალაქების და სოფლების ბიბლიოთეკების გრანდიოზული მიჯირყვნის მოწმე ვარ პირადად და ახლა ეს უკუ პროცესი უზომოდ მახარებს. შარშან ბავშვთა და ახალგაზრდობის ეროვნულ ცენტრთან ვთანამშრომლობდი და უფროსკლასელებმა გადაწყვიტეს, სოფლების ბიბლიოთეკებისთვის შეეგროვებინათ წიგნები. მართლა უამრავი წიგნი შეგროვდა. ჩავიტანეთ ეს წიგნები ჩარგლის დაწყებით სკოლაში და ნუკრიანის მეორე საჯარო სკოლაში. მაშინ დავრწმუნდი, ბავშვებს ჯერ კიდევ ახსოვთ წიგნის მნიშვნელობა. ამიტომ არის ძალიან კარგი, თუკი რეგიონებში ბიბლიოთეკებს ცოდნის ცენტრებად გადავაქცევთ“.

პროექტი - ეროვნული ბიბლიოთეკის, სახელმწიფო სერვისების განვითარების სააგენტოს, საერთაშორისო კვლევისა და გაცვლების საბჭოს (IREX), საქართველოს საბიბლიოთეკო ასოციაციის და ინფორმაციის თავისუფლების განვითარების ინსტიტუტის თანამშრომლობით ხორციელდება.