საია-ს თავჯდომარის კახა კოჟორიძის თქმით, ჟურნალისტი იძულებული არ არის წყარო დაასახელოს. კოჟორიძემ ტელეკომპანია "რუსთავი 2"-ის მიერ გავრცელებულ ფარულ ჩანაწერებზე მიმდინარე გამოძიებაზე და შესაბამის კანონმდებლობაზე ისაუბრა.

მისი თქმით, სამართლებრივი პროცედურების დროს, თუ პროკურატურა, "რუსთავი 2"-ს სავალდებულოდ მოსთხოვს წყაროს დასახელებას - ეს არ იქნება სწორი, რადგან წყაროს არგამხელისგან ჟურნალისტს იცავს როგორც საქართველოს კანონმდებლობა, ასევე საერთაშორისო კონვენციები და საერთაშორისო სტანდარტები.

კოჟორიძის შეფასებით, სწორია, როდესაც გუშინ დაკითხვაზე მყოფ ნიკა გვარამიას წყაროს თაობაზე კითხვები არ დაუსვეს, თუმცა მისივე მოსაზრებით, კითხვის დასმაში პრობლემა არ არის.

"კითხვა შეიძლება დაისვას. თავისთავად, კითხვის დასმაში არც სამართალდამცავი ორგანოების მხრიდან პრობლემა არ არის. წყაროს შესახებ ინფორმაციას გააჟღერებს თუ არა, ეს არის ჟურნალისტის, ამ შემთხვევაში, გვარამიას ან სხვა ჟურნალისტების გადასაწყვეტი. მაგრამ ვერ დაავალდებულებ კანონის თანახმად. თუ ის არ დაასახელებს წყაროს, მას არ შეიძლება დააკისრო პასუხისმგებლობა წყაროს არდასახელებისთვის", - აღნიშნა კახა კოჟორიძემ.

ტელეკომპანია „რუსთავი 2“-მა ეკა კვესიტაძის გადაცემა „განსხვავებულ აქცენტებში“ მაღალჩინოსნების ფარული სატელეფონო საუბრების ჩანაწერები გაასაჯაროვა. გავრცელებულ ფარულ აუდიო ჩანაწერებში, პარლამენტის თავმჯდომარე დავით უსუფაშვილი, თავდაცვის მინისტრი ირაკლი ალასანია, უშიშროების საბჭოს ყოფილი მდივანი გიგა ბოკერია თბილისის ყოფილი მერი გიგი უგულავა, შალვა ობგაიძე და ბიზნესმენები ფიგურირებენ.