საქართველოს ეროვნული საკალათბურთო ნაკრების წევრი ვიქტორ სანიკიძე აცხადებს, რომ მას კონტრაქტით გათვალისწინებული ყოველგვარი შეთანხმება შესრულებული აქვს. ეს განცხადება სანიკიძემ იტალიური მედიის მიერ გავრცელებული ინფორმაციის საპასუხოდ გააკეთა:

"კონტრაქტით გათვალისწინებული იყო, რომ ჩემი ანაზღაურებიდან გადასახადები კლუბს უნდა გადაეხადა. გამოძიებიდან ირკვევა, რომ ჩვენი პრეზიდენტი პასუხისგებაში მიეცა იმის გამო, რომ ამ გადასახადების გადახდას თავს არიდებდა და სავარაუდოდ, თანხა მის ჯიბეში მიდიოდა. აქედან გამომდინარე, არის პასუხისგებაში მიცემული და ახლაც მიმდინარეობს გამოძიება", - განაცხადა ვიქტორ სანიკიძემ.

შეგახსენებთ, რომ საქართველოს ეროვნული საკალათბურთო ნაკრების წევრი, ვიქტორ სანიკიძე იტალიაში გადასახადების დამალვაში ეჭვმიტანილთა სიაში მოხვდა, ამის შესახებ ინფორმაციას იტალიური მედია ავრცელენს.

იტალიური "მონტეპასკის" 17 ყოფილი მოთამაშე, რომელთა შორის ვიქტორ სანიკიძეცაა მოხსენიებული, გადასახადების დამალვაში ფიგურირებს.

სიაში შეყვანილი კალათბურთელები დაკავშირებულნი არიან "მონტეპასკის" ექს-პრეზიდენტის ფერდინანდო მინუჩის საქმესთან, რომელიც ახლახან დააკავეს.

გამოცემის ინფორმაციით, ვარაუდობენ, რომ მინუჩიმ სახელმწიფოს 16 მლნ ევრო დაუმალა, რომელიც მოთამაშეთა კონტრაქტებისა და ხელფასებიდან ბიუჯეტში გადასახადის სახით უნდა შეეტანა.

იტალიური გამოცემის ცნობით, იტალიურმა პოლიციამ უკვე დაიწყო საქმის მონაწილეთა სატელეფონო საუბრებისა და ელექტრონული მიმოწერის გაშიფვრა.