ტელეკომპანია "რუსთავი 2"-ის ხელმძღვანელობა 19:00 საათზე, მთავარ პროკურატურაში გაკეთებულ განცხადებასთან დაკავშირებით პრესკონფერენციას გამართავს.

ამის შესახებ ინფორმაცია "კურიერის" 18:00 საათიან გამოშვებაში გავრცელდა. გავრცელებული ცნობით, მთავარ პროკურატურაში გამართულ ბრიფინგამდე არხის ხელმძღვანელი პირები – ნიკა გვარამია, მისი ორი მოადგილე – ნინო შუბლაძე და დუდუ კურდღელია, ასევე წამყვანი ზაალ უდუმაშვილი და კიდევ ერთი თანამშრომელი დაკითხვაზე იმყოფებოდნენ.

მათი განცხადებით, დაკითხვაზე არც ერთი შეკითხვა არ დასმულა გავრცელებულ კადრებთან დაკავშირებით და გამოძიებას ძირითადად "რუსთავი 2"-ში უსაფრთხოების სამსახურის მუშაობასთან დაკავშირებული საკითხი აინტერესებდა.

პროკურატურის მიერ გავრცელებული ინფორმაციის თანახმად, ფარული მოწყობილობების შესახებ ნიკა გვარამიას თავის დროზე უსაფრთხოების სამსახურის უფროსმა თეიმურაზ კოვზიაშვილმა აცნობა, თუმცა გვარამიამ განუცხადა რომ „არ ენერვიულა ამ ფაქტზე და ჩვეულ რეჟიმში გაეგრძელებინა მუშაობა“.

ტელეკომპანია "რუსთავი2"-ის გენერალური დირექტორის, ნიკა გვარამიასა და საინფორმაციო სამსახურის უფროსის, ნინო შუბლაძის სამუშაო კაბინეტებში მოსასმენი მოწყობილობები აღმოაჩინეს. ჩანაწერები სავარაუდოდ გასული წლის ივნისშია გაკეთებული.