საქართველოს გარემოსა და ბუნებრივი რესურსების დაცვის სამინისტროს ეროვნული სატყეო სააგენტოს მიერ მცხეთა-დიდგორის სატყეო უბანზე (მცხეთა-მთიანეთის რეგიონი), ავიაციის დახმარებით ტყის მავნებლებთან ბრძოლის ღონისძიებები დაიწყო. ფრენა ნატახტრის აეროდრომიდან რამდენიმე სააათის განმავლობაში ხორციელდებოდა და წამლის გაფრქვევა აღნიშნულ ტერიტორიაზე ულტრა-მცირე მოცულობის ჭავლით მიმდინარეობდა. შეწამვლას ეროვნული სატყეო სააგენტოს წარმომადგენლები დაესწრნენ.

შესაწამლი პრეპარატი-ლეპიდოციდი-CKM წარმოადგენს ბიოლოგიურ ინსექტიციდს, რომელიც განსაკუთრებული სიფრთხილით შეირჩა, რადგან შეწამვლა დასახლებულ პუნქტებსა და სასოფლო სამეურნეო სავარგულებთან ახლოს ხდება. პრეპარატი - ტყის სახეობებთან ერთად სასოფლო-სამეურნეო კულტურების (ხეხილი, ვაზი, ბოსტნეული, დეკორატიული მცენარეები და სხვ) დასამუშავებლადაც გამოიყენება და ჯანმრთელობის დაცვის მსოფლიო ორგანიზაციის (WHO) კლასიფიკაციით მიეკუთვნება საშიშროების ყველაზე დაბალ კლასს, მითითებული ნორმით და წესით გამოყენების შემთხვევაში არ არის ტოქსიკური ადამიანების, თბილსისხლიანი ცხოველებისა და ფრინველებისათვის, თევზების, ფუტკრებისა და სასარგებლო მწერებისათვის (შეწამვლის პროცესში რეკომენდებულია ფუტკრის ფრენის შეზღუდვა).

პრეპარატის ავიაშესხურების პროცესი მცხეთა-დიდგორისა და წალკა-თეთრიწყაროს სატყეო უბნებზე (2000 ჰა) კიდევ რამდენიმე დღის განმავლობაში, დილით, მზის ამოსვლამდე და საღამოს საათებში განხორციელდება. მეტეოროლოგიური პირობების შეცვლის შემთხვევაში შეწამვლითი სამუშაოები შესაძლებელია გახანგრძლივდეს.

ფოთლის მღრღნელი მავნებლების: ცქვლეფია მზომელა, მოზამთრე მზომელა, ოქროკუდა, ფოთლის ხერხია, მწვანე მატლები და სხვა მავნე მწერების მასობრივი გავრცელება 2013 წლის მაისში თბილისის შემოგარენში (წყნეთი, ახალდაბა, ბირთვისი, ბეთანია, კოჯორი, თეთრიწყაროს საზღვარი, ბირთვისი, მცხეთა-დიდგორი) ფოთლოვან სახეობებზე (მუხნარ-რცხილნარი, კუნელი და სხვა) გამოვლინდა. აღნიშნულ ტერიტორიებზე ჩატარდა რეკოგნოსცირებული გამოკვლევა და დაზუსტდა მავნებლის გავრცელებისა და მაღალი რისკის მქონე ფართობები.