"საყდრისში შსს შემადგენლობის და ტექნიკის მობილიზებას ახდენს"

საზოგადოება - 17:20, 08 May, 2014

2104

საყდრისის გადარჩენის კომიტეტი განცხადებას ავრცელებს. "ნიუპოსტი" განცხადების ტექსტს უცვლელად გთავაზობთ: "როგორც დღეს ჩვენთვის გახდა ცნობილი, ხელისუფლება საყდრისში შსს შემადგენლობის და ტექნიკის მობილიზებას ახდენს.
ხვალ, 9 მაისს არქეოლოგიური ობიექტის ნგრევის დაწყება იგეგმება! მოგახსენებთ, რომ საყდრისის განადგურებას არავითარი სამართლებრივი, მეცნიერული თუ მორალური დასაბუთება არა აქვს. ჩვენ, ვისთვისაც მნიშვნელოვანია ქართული კულტურული მემკვიდრეობის ბედ-იღბალი, ვთვლით რომ მემკვიდრეობა, რომელმაც ათასწლეულებს გაუძლო, რამოდენიმე წლით არჩეული ხელისუფლების ახირებებს არ უნდა შეეწიროს!
ხვალ, დღის 15:00 საათზე, რუსთაველზე, ძველი პარლამენტის წინ საყდრისის გადარჩენის აქცია იგეგმება!
მოვითხოვთ შეწყდეს კულტურული მემკვიდრეობის ბარბაროსული განადგურება და მიეცეს უცხოელ ავტორიტეტულ მეცნიერთა ჯგუფს კომპლექსის სრულად და გამჭვირვალედ შესწავლის საშუალება.
მობრძანდით, დაგვიდექით მხარში საყდრისის გადასარჩენად!" - ნათქვამია განცხადებაში.
"ნიუპოსტი" ინფორმაციის გადასამოწმებლად შსს-ს დაუკავშირდა. ჭიკაიძის უწყებაში აღნიშნულ ინფორმაციას უარყოფენ და აცხადებენ, რომ "შსს არავითარ მობილიზაციას არ გეგმავს".