დუშეთის რაიონში მოსულმა უხვმა ნალექმა მეწყერი გამოიწვია. ამ წუთებში მლეთაში ცენტრალური მაგისტრალის მონაკვეთი ჩაკეტილია. 7 სოფელი კი გარე სამყაროს მოწყვეტილია.

რამდენიმე წუთის წინ საავტომობილო მოძრაობა გაიხსნა იმისთვის, რომ დაგროვილი ავტომობილების ნაკადის გატარება მოხდეს, ამის შემდეგ კი ტერიტორია ჩაიკეტება და შესაბამისად, სამუშაოები კვლავ განახლდება.

სტიქიამ სოფელი ქვეშეთი საგრძნობლად დააზარალა, როგორც ადგილობრივები ყვებიან, იანტალოს ხევი ძლიერი წვიმის შედეგად გუშინ გვიან ღამე ადიდდა და გზის სავალ ნაწილზე გადავიდა.

ცნობილია, რომ სტიქია დუშეთის რაიონის სხვა სოფლებსაც შეეხო, ხადის ხეობა ამ დროისთვის ჩაკეტილია, ოფიციალური ინფორმაციით, ხადის ხეობაში 7 სოფელი გარესამყაროს მოწყვეტილია, ამის გარდა პრობლემებია ასევე გუდამაყარსა და მლეთაში, სადაც ადიდებულმა არგვამა მოსახლეობის სახლებში შეაღწია.