საარჩევნო კომისიის წევრებს, რომლებიც იღებენ პენსიას, კომპენსაციას ან სოციალურ პაკეტს, კომისიაში საქმიანობასთან დაკავშირებით მიღებული ანაზღაურების გამო, პენსია არ შეუწყდება.

ამასთან დაკავშირებით ცვლილებები რამდენიმე კანონში შედის. მათ შორის, "საარჩევნო კოდექსში", "სახელმწიფო კომპენსაციისა და სახელმწიფო აკადემიური სტიპენდიის შესახებ" კანონში და ასევე "სახელმწიფო პენსიის შესახებ" კანონში. ცვლილებების მიხედვით, იმ საქმიანობას, რომლებიც საჯარო საქმიანობად არ ითვლება, საოლქო და საუბნო საარჩევნო კომისიებში საქმიანობა ემატება.

ცვლილებების მიხედვით საოლქო საარჩევნო კომისიის დროებით წევრს და საუბნო საარჩევნო კომისიის წევრს, რომლებიც შეყვანილი არიან სოციალურად დაუცველი ოჯახების ერთიან ბაზაში, შესაბამისი ხელფასი არ ჩაეთვლებათ ოჯახის ერთობლივ შემოსავალში და არ შეუწყდებათ სახელმწიფო დაფინანსება. იგივე ვრცელდება პირებზე, რომლებიც იღებენ სოციალურ პაკეტს მთავრობის დადგენილების შესაბამისად. "სახელმწიფო პენსიის შესახებ" კანონში დაგეგმილი ცვლილებების თანახმად კი, საჯარო საქმიანობად არ ჩაითვლება საარჩევნო კომისიებში განხორციელებული შრომითი ანაზღაურებადი საქმიანობა. იგივე სახით ცვლილებები აისახება "სახელმწიფო კომპენსაციისა და სახელმწიფო აკადემიური სტიპენდიის შესახებ" კანონში.

აღნიშნულ სამ კანონში დაგეგმილი ცვლილებები ბიუროს სხდომაზე დღეს იქნება ინიცირებული.