საპატრიარქოს ყოფილი პათანატომიის კათედრის შენობა გადაეცა

საზოგადოება - 15:40, 05 May, 2014

2029

საქართველოს ეკონომიკის სამინისტრო კიდევ ერთხელ განმარტავს, რომ საპატრიარქოს საკუთრებაში გადაეცა არა ყოფილი "მიხაილოვის" საავადმყოფოს შენობა და ტერიტორია , არამედ ამ ტერიტორიიდან გამიჯნული ნაწილი - ყოფილი პათანატომიის კათედრის შენობა.

ამის შესახებ ეკონომიკის სამინისტრო განცხადებას ავრცელებს, რომელსაც "ნიუპოსტი" უცვლელად გთავაზობთ:

"მედიის საშუალებებში გავრცელებული ინფორმაციის საზოგადოების გარკვეული წევრების მიერ არასწორი ინტერპრეტაციის გამო კიდევ ერთხელ განვმარტავთ, რომ საქართველოს მთავრობის 2014 წლის 23 აპრილის N726 განკარგულებით საქართველოს საპატრიარქოს საკუთრებაში გადაეცა არა ე.წ. ყოფილი "მიხაილოვის საავადმყოფოს" შენობა და ტერიტორია, არამედ ამ ტერიტორიიდან გამიჯნული ნაწილი - ყოფილი პათანოტიმიის კათედრის შენობა (საკადასტრო კოდი N01.16.05.013.045).

საპატრიარქოს განცხადებით, ამ ადგილას მთავარანგელოზის სახელობის ტაძარი აშენდა შპს. ,,ივ. ჯავახიშვილის სახელობის თბილისის სახელმწიფო უნივერსიტეტის კლინიკური საავადმყოფოსთან" (ე.წ. მიხაილოვის საავადმყოფო) ერთად.

კომუნისტური რეჟიმის დროს ტაძარი გადაკეთდა პათანატომიის კათედრის აუდიტორიად, ხოლო ტაძრის საკურთხეველს მიუშენეს შენობა, სადაც განათავსეს პროზექტურა და სტუდენტებს უტარდებოდათ პრაქტიკული მეცადინეობა. 1996 წელს ტაძარს დაუბრუნდა პირვანდელი სახე და მას შემდეგ რეგულარულად მიმდინარეობს წირვა-ლოცვა, ხოლო ზემოხსენებულ შენობა-ნაგებობებს ტაძარი იყენებდა სატრაპეზოდ. საპატრიარქოს დაგეგმილი აქვს გადაცემულ უძრავ ქონებაში განათავსოს საკვირაო სკოლა, ხატწერისა და გალობის სახელოსნოები", - ნათქვამია ეკონომიკის სამინისტროს მიერ განცხადებაში.