საყდრისის გადარჩენის კომიტეტი: RMG სიცრუეს ავრცელებს

საზოგადოება - 15:35, 04 May, 2014

2427

საყდრისის გადარჩენის საზოგადოებრივი კომიტეტის წევრები, კომპანია RMG-ის მიერ გავრცელებულ ინფორმაციას სიცრუეს უწოდებენ. RMG-ს ინფორმაციის თანახმად, კომიტეტის წევრებმა დაცვის სამსახურის თანამშრომლებს ფიზიკური შეუაცხყოფა მიაყენეს.

კომიტეტის წევრმა ირაკლი ლომიძემ განაცხადა, რომ გუშინ მართლაც მოხდა მცირე ინციდენტი, თუმცა დაცვის თანამშრომლებისთვის ფიზიკური შეურაცხყოფა არავის მიუყენებია.

პირიქით, საყდრისის ტერიტორიაზე მთაზე ასული რამდენიმე ადამიანი დაცვამ დაბლა ხელის კვრით ჩამოიყვანა, ერთ-ერთი, ნინო მიქიაშვილი კი, ორი საათის შემდეგ ხელში აიყვანეს და ძალით ისე ჩამოიყვანეს.

"ჩვენი კომიტეტის წევრები, ნინო მიქიაშვილი, ეკა ალფაიძე, ირაკლი მამალაძე, ნინო ბურჭულაძე სამარშრუტო ტაქსიდან ცოტა ზევით ჩამოვიდნენ და საყარაულო კოშკურაზე მთის უკანა მხრიდან ავიდნენ. დაცვის სამსახურმა ისინი სულ ხელის კვრით ჩამოიყვანეს დაბლა, მხოლოდ ნინო მიქიაშვილმა გაძლო 2 საათი და ისიც ხელში აყვანილი ძალით ჩამოიყვანეს. კომპანიამ გუშინ ამ ფაქტზე დეზინფორმაცია გაავრცელა. ვინ მიაყენებდა ფიზიკურ დაზიანებას ორმეტრიან დაცვის თანამშრომლებს - გოგოები თუ ბავშვები?!", - აღნიშნა ირაკლი ლომიძემ.