ნოშრევან ნამორაძე დავით კოდუას ბავშვობის მეგობარი იყო

საზოგადოება - 21:33, 03 May, 2014

11830

შსს-ს მიერ დაკავებული ნოშრევან ნამორაძე დავით კოდუას ბავშვობის მეგობარი იყო და მას, მისი შვილის ძიძა, რომელიც თავდასხმისას მასთან ერთად იმყოფებოდა იცნობდა. აღნიშნული განცხადება ტელეწამყვანმა ნანუკა ჟორჟოლიანმა ტელეკომპანია "რუსთავი-2" -ის ეთერში გააკეთა.

“ნოშრევან ნამორაძეს ვიცნობ ოღონდ არა კოდუებისგან, არამედ როგორც “რუსთავი 2”-ის კორესპონდენტი, როდესაც ბიგ-ბენთან მომხდარ ინციდენტზე რეპორტაჟს ვამზადებდი. 2006 წელს მან თავისი მეგობარი და ბიზნესპარტნიორი კურცხალია დაჭრა. დედაქალაქის ცენტრში მოხდა გარჩევა, რაც ორმხრივ სროლაში გადაიზარდა. ნოშრევან ნამორაძე იყო დავით კოდუას მეგობარიც და მათ ასევე ჰქონდათ გარკვეული უთანხმოება. შემიძლია გითხრათ, რომ ნამორაძეს ჩვენება პირველად არ მიუცია. არჩევნების შემდეგ მან არაერთი ჩვენება მისცა დავით კოდუას წინააღმდეგ და ირწმუნებოდა, რომ დავით კოდუასთან ჰქონდა ბიზნესწილებთან დაკავშირებით დავა. ირაკლი ზაქაიძის, სხვა ბიზნესპარტნიორებისა და დოკუმენტაციის წარდგენის შემდეგ საქმეს მსვლელობა არ მიეცა”, - განაცხადა ნანუკა ჟორჟოლიანმა.

მისივე თქმით, იმ ტერიტორიაზე, სადაც დღეს ინციდენტი მოხდა 8 სათვალთვალო კამერაა დამონტაჟებული. ტელეწამყვანმა ეთერში რუქაც წარადგინა, რომელშიც აღნიშნულია, სათვალთვალო კამერების განლაგება ინციდენტის ტერიტორიაზე.

დავით კოდუას დღეს, თბილისში ქუჩაზე დაესხნენ თავს. როგორც მისი ოჯახის წევრები აცხადებენ კოდუა შვილთან და მის ძიძასთან ერთად აბაშიძის ქუჩაზე სილამაზის სალონში იმყოფებოდა.

"დღეს, დღის 15:00 საათისთვის, აბაშიძეზე, დათო კოდუამ ( ერეკლეს ძმამ) სალონში წაიყვანა 4 წლის ბავშვი თმების შესაჭრელად. მას ტელეფონზე დაურეკეს, გარეთ გავიდა და შუა ბარნოვზე თავს დაესხა 4 ნიღბიანი შეიარაღებული პირი. გათიშეს ელექტროშოკებით და შემდეგ სცემეს! ჯანმრთელობის მდგომარეობა ძალიან მძიმეა. ის რეანიმაციულში გადაიყვანეს", - წერს დაზარალებულის რძალი ნანუკა ჟორჟოლიანი "ფეისბუქზე".

თავის მხრივ, შინაგან საქმეთა სამინისტრომ მომხდართან დაკავშირებით განცხადება გაავრცელა სადაც ნათქვამია, რომ კოდუაზე თავდამსხმელი სამართალდამცველებს ჩაბარდა.

"შსს-მ დავით კოდუას ცემის ფაქტზე ერთი პირი დააკავა. შსს-ს ვაკე-საბურთალოს სამმართველოს პირველ განყოფილებაში გამოცხადდა 1976 წელს დაბადებული ნოშრევან ნ, რომელმაც განაცხადა, რომ მან შურისძიების ნიადაგზე სცემა დავით კოდუა.

დაკავებული აღიარებს ჩადენილ დანაშაულს.

გამოძიება ცემის ფაქტზე მიმდინარეობს საქართველოს სსკ-ს 125-ე მუხლით", - ნათქვამია განცხადებაში.