ფონდ "ქართუს" წარმომადგენლებმა ტელეკომპანია "რუსთავი 2- ის წინ აქცია გამართეს. აქციის მონაწილეებმა "რუსთავი 2"-ის ეთერში გასული სიუჟეტი გააპროტესტეს.

როგორც საინიციატივო ჯგუფის წევრები აცხადებენ, რეპორტაჟში მოყვანილი ფაქტები არ შეესაბამებოდა სიმართლეს. მათ ამ თემაზე ბრიფინგი 2 დღის წინაც გამართეს.

ფონდი “ქართუ” ტელეკომპანია „რუსთავი 2“-ს სიცრუის გავრცელებაში ადანაშაულებს.

ფონდის გამგეობის თავმჯდომარის ნიკოლოზ ჩხეტიანის თქმით, “ქართუს” მიერ შექმნილი აგროცენტრი თავისი უძრავ-მოძრავი ქონებით “ქართუმ” სახელმწიფოს უსასყიდლოდ გადაეცა, “რუსთავი 2”-მა კი აგროპროექტი ბიძინა ივანიშვილის პირად ახირებად წარმოაჩინა.

ჩხეტიანი ასევე გამოეხმაურა ბათუმში მშენებარე რაგბის სტადიონის დაფინანსებაზე გასულ სიუჟეტს. მისი თქმით, სიუჟეტში საუბარი იყო, რომ ბათუმის თვითმმართველობამ სტადიონის მშენებლობა ბიძინა ივანიშვილის ძმის ადიკო ივანიშვილის ფირმას ტენდერის გარეშე გადასცა.

მისი თქმით, ფონდ “ქართუს” არ აქვს და ვერც ექნება ვერანაირი ვალდებულება სახელმწიფოს ინფრასტრუქტურული ობიექტების მიმართ და რაგბის სტადიონების ქსელის მშენებლობა ფონდის კეთილი ნებით ხორციელდება.