რუსთავში, მიკროავტობუსის მძღოლის გარდაცვალებასთან დაკავშირებით კომპანია „ინტერნტრანსი“ განცხადებას ავრცელებს.

კომპანია გარდაცვლილის ოჯახს სამძიმარს უცხადებს და სამართალდამცველებს რეაგირებისკენ მოუწოდებს, რათა არავის მიეცეს საშუალება, „საკუთარი მიზნებისათვის გამოიყენოს ადამიანის ტრაგედია“.

"დღეს რუსთავში მომხდარ ტრაგიკულ ფაქტთან დაკავშირებით გვინდა სამძიმარი გამოვუცხადოთ გარდაცვლილი მძღოლის, ვეფხია გოგილაშვილის ოჯახს. ვეფხია გოგილაშვილი რუსთავი-თბილისის სამარშრუტო ხაზზე მუშაობდა. "ინტერტრანსი" ამ კონკრეტულ მარშრუტზე ამ დროისათვის საკუთარი მიკროავტობუსების შეყვანას არ გეგმავდა, რადგან მძღოლებთან თანამშრომლობაზე მოლაპარაკება მიმდინარეობს. ვეფხია გოგილაშვილი რამდენჯერმე იყო კომპანიაში მისული და თანხმობას აცხადებდა თანამშრომლობაზე. ჩვენ გვაქვს დაზუსტებული ინფორმაცია, რომ ე.წ. ხაზის მეპატრონეებისა და მათი ადვოკატის, რიჟამაძის მხრიდან ხორციელდებოდა ზეწოლა, რათა გოგილაშვილს უარი ეთქვა "ინტერტრანსთან" თანამშრომლობაზე. თხოვნით მივმართავთ სამართალდამცავ ორგანოებს, დროულად მოახდინოს რეაგირება, რათა არავის მიეცეს საშუალება, საკუთარი მიზნებისათვის გამოიყენოს ადამიანის ტრაგედია", – ნათქვამია "ინტერტრანსის" განცხადებაში.

რუსთავი-თბილისის სამარშრუტო ხაზზე მომუშავე ერთ-ერთმა მძღოლმა თავი ჩამოიხრჩო. ფაქტზე გამოძიება 115-ე მუხლით მიმდინარებს, რაც თვითმკვლელობამდე მიყვანას გულისხმობს.