დღეს აჭარის მთავრობის თავმჯდომარემ არჩილ ხაბაძემ ტურიზმისა და სასტუმრო აღჭურვილობის მე-7 საერთაშორისო გამოფენა „EXPO BATUMI 2014“ გახსნა. გამოფენას წელს სასტუმრო შერატონ ბათუმი 2-დან 4 მაისის ჩათვლით უმასპინძლებს.

ღონისძიებას ასევე ესწრებოდნენ საქართველოს ეკონომიკისა და მდგრადი განვითარების მინისტრის პირველი მოადგილე გიორგი ქუმსიაშვილი, ქალაქ ბათუმის მერის მოვალეობის შემსრულებელი გიორგი ერმაკოვი, აჭარაში მოქმედი საკონსულოების გენერალური კონსულები და გუბერნატორები მეზობელი ქვეყნებიდან.

გამოფენაში წელს პირველად იღებს მონაწილეობას გერმანია. გარდა ამისა, ჩართულნი არიან საქართველოს, თურქეთის, ირანის, სომხეთის, აზერბაიჯანის, უკრაინისა და ჩინეთის წარმომადგენლები. „EXPO BATUMI 2014“-ში მონაწილეობენ სასტუმრო ქსელების, სასტუმრო აღჭურვილობის, დეკორაციების, რესტორნებისა და ტურიზმის სფეროში დასაქმებული სხვადასხვა კომპანიის წარმომადგენლები.

აჭარის მთავრობა, ბათუმის მერია და აჭარის ტურიზმისა და კურორტების დეპარტამენტი გამოფენის თანაორგანიზატორები არიან.