კვიპროსზე ქართული არქეოლოგიური კომპლექსი გადარჩენილია

კულტურა - 16:01, 30 Apr, 2014

1909

2014 წლის 29 აპრილს კვიპროსზე ღალიის X-XVI საუკუნეების ქართული განახლებული არქეოლოგიური კომპლექსი ოფიციალურად კვიპროსის რესპუბლიკის ინფრასტრუქტურისა და შრომის მინისტრმა მარიოს დემეტრიადესმა და საქართველოს კულტურისა და ძეგლთა დაცვის მინისტრმა გურამ ოდიშარიამ გახსნეს.

ორი სახელმწიფოს მიერ განხორციელებული ეს ისტორიული მნიშვნელობის პროექტი ასე შეაფასა კვიპროსის რესპუბლიკის ინფრასტრუქტურისა და შრომის მინისტრმა მარიოს დემეტრიადესმა: „კვიპროსის უძველესი ქართული არქეოლოგიური კომპლექსის რეაბილიტაციისა და პოპულარიზაციის პროექტი სხვა ქვეყნებისთვისაც უნდა იქცეს იმის მაგალითად, თუ როგორ ითანამშრომლოს ორმა ქვეყანამ კულტურული მემკვიდრეობის საერთო სიძველეების აღსადგენად“.

ღალიის მონასტრის სარეაბილიტაციო პროექტი რამდენიმე წლის წინათ დაიწყო და ქართველი და კვიპროსელი სპეციალისტების თანამონაწილეობით განხორციელდა. მხარეებს შორის დადებული მემორანდუმის თანახმად, ძეგლის არქეოლოგიურ-კვლევითი და სარეაბილიტაციო სამუშაოები დააფინანსა და აწარმოა - საქართველომ, ხოლო საკონსერვაციო სამუშაოები დააფინანსა და აწარმოა - კვიპროსის რესპუბლიკამ.

ამ უდიდესი მნიშვნელობის პროექტის ფარგლებში, ნანგრევებისგან და მიწისგან გაიწმინდა, გამაგრდა და დაკონსერვდა ღალიის ღვთისმშობლის მონასტერი და მასში შემავალი წმ. გიორგისა და წმ. ნიკოლოზის ეკლესიები.

აღდგენილი ღალიის ქართული მონასტერი კვიპროსის ტურისტულ რუკაზე დაფიქსირდა, როგორც უძველესი ქართული ძეგლი. უახლესი მონაცემით, ქართული ძეგლი უკვე უცხოელი ტურისტებისთვისაც იქცა ერთ-ერთ საინტერესო ღირსშესანიშნაობად.

ღალიის ქართული ისტორიული კომპლექსი გაიხსნა საქართველოს კულტურისა და ძეგლთა დაცვის მინისტრის, გურამ ოდიშარიასა და კულტურული მემკვიდრეობის დაცვის ეროვნული სააგენტოს გენერალური დირექტორის ნიკა ანთიძის კვიპროსის რესპუბლიკაში ოფიციალური ვიზიტის ფარგლებში.

ქართული დელეგაციის სამუშაო ვიზიტი კვიპროსის რესპუბლიკაში გრძელდება. დღეს, 30 აპრილს, საქართველოს კულტურისა და ძეგლთა დაცვის მინისტრი გურამ ოდიშარია ეწვევა კვიპროსის რესპუბლიკის განათლებისა და კულტურის სამინისტროს. ასევე, დაათვალიერებს ნიქოზიის არქეოლოგიისა და მეუფე მაკარიოს III-ს მიერ დაარსებულ ბიზანტიის მუზეუმებს.

კულტურული მემკვიდრეობის დაცვის ეროვნული სააგენტოს გენერალური დირექტორი ნიკა ანთიძე კი კვიპროსის სიძველეთა დაცვის დეპარტამენტის ხელმძღვანელ პირებს შეხვდება. შეხვედრაზე განიხილავენ თანამშრომლობის სამომავლო გეგმებსა და იმ კონკრეტულ პროექტებს, რომელიც კვიპროსის სიძველეთა დაცვის დეპარტამენტსა და საქართველოს კულტურული მემკვიდრეობის დაცვის ეროვნულ სააგენტოს შორის 2014 წლის 4 თებერვალს საქართველოს კულტურის სამინისტროში გაფორმებული ურთიერთთანამშრომლობის მემორანდუმით უნდა განხორციელდეს.