საქველმოქმედო ფონდ “ქართუს” გამგეობის თავმჯდომარე ნიკოლოზ ჩხეტიანი ტელეკომპანია „რუსთავი 2“-ს სიცრუის გავრცელებაში ადანაშაულებს.

როგორც დღღეს გამართულ პრესკონფერენციაზე ჩხეტიანმა განმარტა “ქართუს” მიერ შექმნილი აგროცენტრი თავისი უძრავ-მოძრავი ქონებით “ქართუმ” სახელმწიფოს უსასყიდლოდ გადაეცა, “რუსთავი 2”-მა კი აგროპროექტი ბიძინა ივანიშვილის პირად ახირებად წარმოაჩინა.

ჩხეტიანი ასევე გამოეხმაურა ბათუმში მშენებარე რაგბის სტადიონის დაფინანსებაზე გასულ სიუჟეტს. მისი თქმით, სიუჟეტში საუბარი იყო, რომ ბათუმის თვითმმართველობამ სტადიონის მშენებლობა ბიძინა ივანიშვილის ძმის ადიკო ივანიშვილის ფირმას ტენდერის გარეშე გადასცა.

მისი თქმით, ფონდ “ქართუს” არ აქვს და ვერც ექნება ვერანაირი ვალდებულება სახელმწიფოს ინფრასტრუქტურული ობიექტების მიმართ და რაგბის სტადიონების ქსელის მშენებლობა ფონდის კეთილი ნებით ხორციელდება.

“სრული სიცრუეა ის, რომ სტადიონის მშენებლობის მწარმოებელი ორგანიზაცია ასოციაცია “ატუ” ადიკო ივანიშვილს ეკუთვნის. იგი არ არის ამ ორგანიზაციის დამფუძნებელი და არ მონაწილეობს მმართველი ორგანოების საქმიანობაში. პასუხისმგებლობის მქონე მედისაშუალებას მარტივად შეუძლია ამის გადამოწმება სამეწარმეო რეესტრის მონაცემთა ბაზაში”, - განაცხადა ჩხეტიანმა და აღნიშნა, რომ “ქართუს” ყველა პროექტი ხორციელდება სახელმწიფოსთვის და მათი დასრულების შემდეგ სახელმწიფოს გადაეცემა.