დეფი წიგნების გამოსაცემად სპონსორს ეძებს

საზოგადოება - 13:18, 29 Apr, 2014

2051

სტატუსი ფეისბუქზე: „ჩემი ახალი რომანის და ახალი პოეზიის წიგნის გამოსაცემად ვეძებ სპონსორს. სპონსორი ასევე მჭირდება ჩემი და ჯგუფი სანდას ერთობლივი აუდიო-ალბომისა და ნიუ იორკის პერიოდის პოეზიის გამოსაცემადაც.“

ეს განცხადება დეფიმ ფეისბუქის საკუთარ გვერდზე ატვირთა, „ნიუპოსტთან“ საუბრისას კი განაცხადა რომ მიუხედავად უამრავი მცდელობისა ფინანსებთან დაკავშირებით არავინ გამოხმაურებია.

დეფი: „2012 წელს, აგვისტოში, დავწერე რომანი „სამყაროს ყველა საიდუმლო“, მაგრამ გამომცემლობა სიესტაში ფინანსური კრიზისის გამო რომანი მკითხველმა 2014 წლის მარტში იხილა. წიგნი ნაწილობრივ სიესტას თანხითაა გამოცემული, ნაწილობრივ კი ფეისბუქზე არსებული ჩემი მკითხველთა ჯგუფის მიერ შეაგროვებული ფულით. იდეა ნინა ლომიძესა და მარიამ კიკაჩეიშვილს ეკუთვნის. ბევრი კეთილშობილი პიროვნების მიერ საჭირო თანხა შეგროვდა, მადლობა ყოველ მათგანს ასეთი გულისხმიერებისთვის... და წიგნი უმცირესი ტირაჟით გამოიცა. მას მერეც და მანამდეც დაგროვებული ჩემი ნაწარმოებები, ზოგადად ინტერნეტის გარდა და ჩემი საიტის გარდა, უფრო ხელშესახებ ფორმაში არსებობასაც ითხოვენ. 2013 დავასრულე რომანი „დასასრულისა და დასაწყისის საზოგადოება“ და პოეზიის წიგნებიც შევკარი. ასევე სტუდიაშიც მოვრჩი ჩაწერებს უნიკალურ ჯგუფ სანდასთან ერთად. ალბომზე დღე და ღამე ვმუშაობდით. წიგნების ან ალბომის გამოცემა არც ადრე იყო ადვილი საქმე, მაგრამ დღეს ამ ყველაფრის დასტამბვა და ტირაჟირება, უკვე დიდი სირთულეა ჩემთვის. ვეძებთ სპონსორს ვინც თუნდაც ორი წიგნის, რომანისა და პოეზიის გამოცემაში, მე და სიესტას მოგვეხმარება.“