სოზარ სუბარი ბათუმში საპატიმრო დაწესებულებას გახსნის

საზოგადოება - 13:22, 29 Apr, 2014

1791

საქართველოს სასჯელაღსრულებისა და პრობაციის მინისტრი სოზარ სუბარი დღეს სასჯელაღსრულების დეპარტამენტის თავმჯდომარესთან და სამინისტროს სხვა წარმომადგენლებთან ერთად ბათუმის #3 დაწესებულებას გახსნის.
"230-მდე პატიმარზე გათვლილ რეაბილიტირებულ და გარემონტებულ დაწესებულებაში კეთილმოეწყო საკნები, დამონტაჟდა გათბობის სისტემა, რომელიც აქამდე არ არსებობდა, კარები აღიჭურვა სპეციალური, ორმაგი ელექტრონული საკეტებით და ხმოვანი გამოძახების სისტემით, რომელიც დაცვისა და უსაფრთხოების მაღალ დონეს ქმნის.
ამასთან, შეიქმნა შესაბამისი სივრცე სამედიცინო სერვისის განსახორციელებლად, პირველადი ჯანდაცვისა და სანიტარულ განყოფილებასთან ერთად მოეწყო სტომატოლოგიური კაბინეტი, ასევე მოეწყო ხანგრძლივი პაემნისთვის განკუთვნილი ინფრასტრუქტურა, რომელიც დაწესებულებაში არ მოქმედებდა, ისევე როგორც სამრეცხაო.
ამჟამად დაწესებულებაში შესაბამისი ტექნიკით აღიჭურვა სამრეცხაო ოთახი, განახლდა კვების ბლოკი, ევროპული სტანდარტების შესაბამისად აიგო შემზღუდავი ღობეები, კოშკურები, დამონტაჟდა დამცავი ბადეები, გაკეთდა სავენტილაციო და საკანალიზაციო სისტემები.

დაწესებულებაში ამოქმედდება საზოგადოებრივი მისაღები, რომელიც პატიმართა ოჯახის წევრებსა და ინტერესების დამცველებს მოემსახურება", - ნათქვამია უწყების მიერ გავრცელებულ განცხადებაში.
მათივე ინფორმაციით, დაწესებულების გახსნას სამოქალაქო სექტორისა და მედიის წარმომადგენლებიც დაესწრებიან.