განათლების სამინისტროს ინიციატივით, სკოლებში ფსიქოლოგიური ცენტრები გაიხსნება, სადაც ვიდეო და აუდიო ჩამწერი აპარატურა დამონტაჟდება. შესაბამისად, ფსიქოლოგის და მოსწავლის საიდუმლო საუბარი როგორც ვიდეო, ისე აუდიო ფაილზე აღიბეჭდება.

განათლების ყოფილი მინისტრი დიმიტრი შაშკინი „ნიუპოსტთან“ საუბარში აღნიშნულ ინიციატივას უკანონოს უწოდებს და მშობლებს რეაგირებისკენ მოუწოდებს.

მისი განმარტებით, არ არსებობს გარანტია, რომ ფსიქოლოგის ოთახში ჩაწერილი ჩანაწერი მთელს სკოლაში არ „გაბაზრდება“.

„სკოლებში დაიწყეს ე.წ. ფსიქოლოგთა ოთახების მომზადება, სადაც იმუშავებენ ფსიქოლოგები. სასწრაფოდ დაიწყეს ამ ოთახების აღჭურვა ვიდეო და აუდიო სათვალთვალო აპარატურით. პირველ რიგში, არ არსებობს სტანდარტი ფსიქოლოგის, რომელიც სკოლაში იმუშავებს. საინტერესოა, როგორ იქნება დაცული ბავშვის უფლებები, როდესაც არ არსებობს რეგულაციები. არანაირი გარანტია არც ერთ მშობელს არ აქვს, რომ ის რაზეც ბავშვი ამ ოთახში ისაუბრებს, მერე მთელ სკოლაში არ იქნება „გაბაზრებული“. ბევრად უფრო ცუდი რაც ხდება არის ის, რომ ეს საკითხი უკვე გადაწყვეტილია და განათლების სამინისტრო ამბობს, რომ ეს არ გადაიხედება. მე წავიკითხე მანდატურის ერთ-ერთი ხელმძღვანელის განცხადება, სადაც ის ამბობს, რომ მსოფლიოში მიღებული პრაქტიკაა, როდესაც ჰიპნოთერაპია ჩაწერილია ვიდეო და აუდიოაპარატურის მეშვეობით. ეს რა პრაქტიკაა? ჰიპნოზით უნდა უმკურნალონ ბავშვებს? საერთოდ ამ აპარატურის დამონტაჟებას დიდი აჟიოტაჟი მოჰყვა, რადგან პროფესიონალი ფსიქოლოგები ამბობენ, რომ არავითარ შემთხვევაში არ შეიძლება ფსიქოლოგის მუშაობის ჩაწერა აუდიო ან ვიდეო აპარატურით, რადგან აქ არის საიდუმლო მომენტები. მაინტერესებს, კაშპიროვსკის ხანაში ხომ არ ვბრუნდებით? მე მინდა ოფიციალურად გავაფრთხილო მშობლები, არ არსებობს ოფიციალური რეგულაცია, არ არსებობს არანაირი საკანონმდებლო ბაზა და სტანდარტი ფსიქოლოგის მუშაობის საჯარო სკოლებში. ვაფრთხილებ მშობლებს ფაქიზად მიუდგნენ ამ საკითხს“, - აცხადებს შაშკინი.