დღეს ქობულეთის გამგეობაში ქობულეთის მუნიციპალიტეტის მიწების დამშრობი სისტემების რეაბილიტაცის პროექტის პრეზენტაცია გაიმართა, რომელსაც ესწრებოდნენ აჭარის მთავრობის თავმჯდომარე არჩილ ხაბაძე, აჭარის სოფლის მეურნეობის მინისტრი ზაურ ფუტკარაძე, ქობულეთის გამგებელი გიორგი რომანაძე, საქართველოს გაერთიანებული სამელიორაციო სისტემების კომპანიის დირექტორი ვაჟა კირტავა და უკრაინის საპროექტო ინსტიტუტის წარმომადგენლები.

ქობულეთის მუნიციპალიტეტის მიწების დამშრობი სისტემების რეაბილიტაციის ფარგლებში, 2500 ჰა სასოფლო-სამეურნეო მიწის ფართობზე მოხდება ჭარბი წყლების მოცილება. პროექტით დაგეგმილია 3 სატუმბი სადგურის აშენება, რომლის საშუალებითაც ჭარბი წყლები მილსადენის საშუალებით ინტენსიურად გაიყვანება ფართობებიდან ზღვაში. ასევე, ქობულეთის ცენტრალური მაგისტრალი და მოსახლეობა დატბორვისგან იქნება დაცული; არსებული ნაკრძალი შემოისაზღვრება დამბებით. მიმდებარე სოფლების დატბორვის თავიდნ აცილების მიზნით დარეგულირდება მდ. ტოგონის და მდ. ოჩხამურის ნაპირები.

"პროექტის განხორციელებით ჩვენ ინვესტორების მოზიდვას და ადგილობრივი წარმოების გაზრდას შევძლებთ. აქამდეც ინტერესდებოდნენ ინვესტორები, მაგრამ რადგანაც ამ ტერიტორიებზე 30 წელია არ ჩატარებულა სამუშაოები, მიწა იყო დაუმუშავებელი და წყლით გაჯერებული. გამართული სამელიორაციო სისტემის მოწყობით, ამ მიწებზე შესაძლებელი გახდება მეცხოველეობის და მემცენარეობის დარგში ინვესტორების მოზიდვა, პროდუქციის წარმოება შიდა და საერთაშორისო ბაზრებისთვის. აქვე მინდა ერთმნიშვნელოვნად აღვნიშნო, რომ ინვესტორებზე მიწები გაიცემა გრძელვადიანი იჯარით და არც ერთი მიწის ნაკვეთი არ გაიყიდება." - განაცხადა არჩილ ხაბაძემ.

პროექტირება დასრულდება მიმდინარე წლის 30 მაისს. სარეაბილიტაციო სამუშაოები კი პროექტის ექსპერტიზის ჩატარების შემდეგ-მიმდინარე წლის ივლისი-აგვისტოს თვეში დაიწყება და 2017 წელს დასრულდება. აღნიშნულ პროექტზე, უკრაინის საპროექტო ინსტიტუტის „უკრ ვოდპროექტისა“ სპეცალისტები მუშაობენ.

სარეაბილიტაციო სამუშოების წინასწარი ღირებულებაა 11 მლნ 800 ათასი ლარი.ამ დროისთვის, სარწყავი სისტემების პრაკტიკულად ყველა დიდი მაგისტრალური არხი გაწმენდილია, მგავსი სამუშაოები ბოლო 25-30 წელია არ ჩატარებულა.