ცენტრი "ერთობა" ნოდარ ხადურს მიმართავს

საზოგადოება - 15:41, 24 Apr, 2014

1894

ნოდარ ხადურისგან ცენტრი "ერთობა" ითხოვს, გაარკვიოს რამდენია კოოპერატიული ბინათმშენებლების წინაშე არსებული სახელმწიფოს საშინაო ვალი.

"ერთობში" აცხადებენ, რომ საქართველოს სახელმწიფო საშინაო ვალის პრობლემათა შემსწავლელი სახელმწიფო კომისია 2004 წლიდან არსებობს.

2012 წლის 11 დეკემბრის საქართველოს მთავრობის #463 დადგენილებით, კომისიის წევრები შეიცვალა და მას უფლებამოსილების ვადა 2014 წლის 1 იანვრამდე გაუხანგძლივდა. ამის შემდეგ, 2014 წლის 27 იანვარს, საქართველოს მთავრობის #105 დადგენილებით ისევ შეიცვალა კომისიის წევრები.

როგორც ცენტრში აცხადებენ, 2004 წლიდან 2012 წლამდე, "ნაციონალური მოღვაწეობის" პერიოდში, აღნიშნულ კომისიას კოოპერატიული ბინათმშენებლობის წევრთა მიმართ სახელმწიფოს მიერ აღიარებული ვალის დასათვლელად არც ერთი ქმედითი ნაბიჯი არ გადაუდგამს და კომისიის სხდომა მხოლოდ 4-ჯერ ჩატარდა.
ცენტრის განცხადებით, კომისიაში "ითვლიდნენ" ვალს და ასევე "მიმდინარეობდა" დაზარალებულთა პასპორტიზაცია.

"ახალი ხელისუფლების მოსვლის შემდგომ, 2012 წლიდან აღნიშნულმა კომისიამ ჩაატარა 2 სხდომა. ჩვენს, და სხვა საზოგადოებრივი ორგანიზაციების, ასევე დაზარალებულთა მრავალჯერად შეკითხვაზე, თუ რა ვითარებაა საშინაო ვალის ამ ნაწილში, პასუხი იგივე ისმის _ "მიმდინარეობს ვალის დათვლა, პასპორტიზაცია-ინვენტარიზაცია". ისევ იცვლებიან კომისიის წევრები, წლიდან წლამდე ისევ უხანგძლივდება კომისიას უფლებამოსილების ვადა. გისვამთ კონკრეტულ შეკითხვას: რამდენია სახელმწიფო საშინაო ვალის ეს ნაწილი, კერძოდ, კოოპერატიული ბინათმშენებლების წინაშე არსებული ვალი. იმედს ვიტოვებთ, რომ საქართველოს ფინანსთა მინისტრი ბატონი ნოდარ ხადური, რომელიც ამავდროულად "სახელმწიფო საშინაო ვალის პრობლემათა შემსწავლელი სახელმწიფო კომისიის" თავმჯდომარეცაა, ასევე კონკრეტულ პასუხს გაგვცემს", - აცხადებენ ცენტრ "ერთობაში".