საქართველოს სოფლის მეურნეობის სამინისტროში გაიმართა ახალი წყალსაცავის პროექტის პრეზენტაცია, რომელიც კასპის მუნიციპალიტეტში, თეძამის ხეობაში, მდინარე თეძამზე აშენდება. პრეზენტაციას ესწრებოდნენ საქართველოს პარლამენტის, ეკონომიკისა და მდგრადი განვითარების სამინისტროს, გარემოს დაცვისა და ბუნებრივი რესურსების სამინისტროს, ადგილობრივი თვითმმართველობის წარმომადგენლები, ასევე საქართველოს ტექნიკური უნივერსიტეტის სპეციალისტები. პრეზენტაცია უკრაინის საპროექტო ინსტიტუტის „უკრ ვოდპროექტისა“ სპეციალისტებმაწარმოადგინეს.

12 მლნ მ3 მოცულობის წყალსაცავი მოემსახურება და წყლით უზრუნველყოფს სხვადასხვა სარწყავ სისტემებს: სიონის მაგისტრალურ არხს, ჩოჩეთის არხს, ნიაბის ზედა არხს, ყარაღაჯის არხს, წაბლა არხს და მეტეხის არხს.

სარწყავი სისტემების რეაბილიტაციის პროგრამის განხორციელება და თეძამის წყალსაცავის მოწყობა უზრუნველყოფს:

1. კასპის მუნიციპალიტეტის ტერიტორიაზე 2600 ჰექტარი სასოფლო-სამეურნეო სავარგულის გარანტირებულად მორწყვას;

2. მდ. თეძამის მიმდებარე სოფლების მოსახლეობა, კაშხალის ქვედა ბიეფში ფილტრატებიდან მიიღებს სასმელ წყალს;

3. მოსახლეობა და სასოფლო-სამეურნეო სავარგულები დაცული იქნება გაზაფხულის წყალმოვარდნებისა და წყალდიდობებისგან;

4. წყალსაცავზე შესაძლებელია აშენდეს 2 მვტ სიმძლავრის ჰესი.

მდინარე თეძამის სიგრძე 51 კმ-ია. სათავეს იღებს თრიალეთის ქედის ჩრდილოეთ კალთებზე, სოფელ საჯას ჩრდილო-დასავლეთით 3 კმ-ში, 2080 მეტრზე ზღვის დონიდან და ერთვის მდინარე მტკვარს მარჯვენა მხრიდან, სოფელ მეტეხის ჩრდილო დასავლეთით 2 კმ-ში.

აღნიშნული პროექტი, უკრაინის საპროექტო ინსტიტუტს „უკრ ვოდპროექტისა“ და „საქართველოს გაერთიანებული სამელიორაციო სისტემების კომპანიას“ შორის გაფორმებულ ურთიერთთანამშრომლობის ხელშეკრულების ფარგლებში, „უკრ ვოდპროექტის“ სპეციალისტებმა შეასრულეს.

წყალსაცავის მოსაწყობი სამუშაოები პროექტის ექსპერტიზის ჩატარების შემდეგ, მიმდინარე წლის ივნისი-ივლისის თვეში დაიწყება და 2018 წელს დასრულდება.

პროექტით სამუშაოების წინასწარი ღირებულებაა 46 მლნ ლარი.

მსგავსი წყალსაცავების მოწყობას საქართველოს გაერთიანებული სამელიორაციო სისტემების კომპანია საქართველოს სხვადასხვა რეგიონებშიც გეგმავს.