დღეს საქართველოში დედამიწის დღე აღინიშნება. ყოველწლიურ ღონისძიებას საქართველო 44 წლის წინ შეუერთდა.

ამ დღესთან დაკავშირებით, გარემოს დაცვისა და ბუნებრივი რესურსების სამინისტრო რამდენიმე ღონისძიებას გეგმავს.

ვაკის პარკსა და მოსწავლე ახალგაზრდობის სასახლესთან მოსწავლეები და სტუდენტები ნახატებს შექმნიან, დღის ბოლოს კი გარემოს დაცვის მინისტრი ქართული მწვანე ბიზნესის ნომინაციაში გამარჯვებულ ბიზნესმენებს დააჯილდოებს.

“დედამიწის დღე კიდევ ერთხელ ახსენებს ყველა ადამიანს და მთელ საზოგადოებას იმის შესახებ, რომ დედამიწაზე, ჩვენს პლანეტაზე ზრუნვა თითოეული ჩვენთაგანის ვალია და ჩვენი სამინისტროც უერთდება ამ გლობალურ აქციას სხვადასხვა სახის ღონისძიებებით. დაგეგმილი გვაქვს მწვანე ბიზნესის დაჯილდოება - კონკურსი, რომელიც გამოცხადდა 2013 წელს და რომელიც მიზნად ისახავდა იმ ბიზნეს სექტორების, იმ კერძო კომპანიების წახალისებას, რომლებიც წარმოების პროცესში მწვანე ტექნოლოგიებს იყენებენ”, - განაცხადა ხათუნა გოგალაძემ.