საია: საყდრისი-ყაჩაღიანის არქეოლოგიურ ობიექტზე, სამთო სამუშაოების განახორციელება დაუშვებელია

საზოგადოება - 15:01, 16 Apr, 2014

2462

საია მიიჩნევს, რომ საყდრისი-ყაჩაღიანში სამთო სამუშაოების წარმოება დაუშვებელია.
"ახალგაზრდა იურისტთა ასოციაცია" საყდრისი-ყაჩაღიანში სამთო სამუშაოების წარმოებასთან დაკავშირებით საზოგადოებაში გავრცელებული ინფორმაციას ეხმაურება.
"მიმდინარე წლის 13 მარტს, საქართველოს კულტურისა და ძეგლთა დაცვის სამინისტროს მიერ მიღებული იქნა #01/01-1227 გადაწყვეტილება, შპს "RMG Gold"-ისთვის საყდრისი-ყაჩაღიანის არქეოლოგიურ ობიექტზე სამთო სამუშაოების განხორციელების მიზნით დადებითი დასკვნის გაცემის თაობაზე. საია-ს ხელთ არსებული დადასტურებული ინფორმაციით, სამინისტროს 13 მარტის გადაწყვეტილება 2014 წლის 11 აპრილს ადმინისტრაციული წესით საქართველოს მთავრობაში გასაჩივრდა. საქართველოს ზოგადი ადმინისტრაციული კოდექსის თანახმად, თუ კანონით ან მის საფუძველზე გამოცემული კანონქვემდებარე აქტით სხვა რამ არ არის დადგენილი, გასაჩივრებული აქტის მოქმედება ადმინისტრაციული საჩივრის რეგისტრაციის მომენტიდან ჩერდება. კანონი ასევე ადგენს, რომ გასაჩივრებული აქტის მოქმედების შეჩერების თაობაზე ადმინისტრაციული ორგანო ინდივიდუალურ ადმინისტრაციულ-სამართლებრივ აქტს გამოსცემს", - ნათქვამია "საიას" მიერ გავრცელებულ განცხადებაში.
"ახალგაზრდა იურისტთა ასოციაციას" ინფორმაციით, დღეის მდგომარეობით, საქართველოს კულტურისა და ძეგლთა დაცვის სამინისტროს მიერ 2014 წლის 13 მარტს მიღებული გადაწყვეტილება, რომლის საფუძველზეც "RMG Gold"-მა საყრდისი-ყაჩაღიანის არქეოლოგიურ ობიექტზე სამთო სამუშაოების განახორციელების მიზნით დადებითი დასკვნა მიიღო, კანონის თანახმად შეჩერებულია.
საიას განცხადებით, საყდრისი-ყაჩაღიანის არქეოლოგიურ ობიექტზე, სამთო სამუშაოების განახორციელების მიზნით სამუშაოების წარმოება დაუშვებელია.
ორგანიზაცია საქართველოს მთავრობას მოუწოდებს, რომ პროაქტიულად, ოფიციალურ ვებგვერდზე უზრუნველყოს იმ სამართლებრივი აქტის გამოქვეყნება რომლის საფუძველზეც საქართველოს კულტურისა და ძეგლთა დაცვის სამინისტროს 2014 წლის 13 მარტის #01/01-1227 გადაწყვეტილების მოქმედება შეჩერდა.

ნინა შადური