ჟურნალისტური ეთიკის ქარტია საგანგებო განცხადებას ავრცელებს

საზოგადოება - 22:58, 15 Apr, 2014

1017

საქართველოს ჟურნალისტური ეთიკის ქარტია აძვში ჟურნალისტების დაკავებას საგანგებო განცხადებით ეხმაურება და სახელმწიფო უწყებებს მიმართავ იზრუნონ მედიის წარმომადგენელთა დაუყონებლივ გათავისუფლებაზე.
“საქართველოს ჟურნალისტური ეთიკის ქარტია შეშფოთებას გამოთქვამს ტელეკომპანია “ტვ 3”-ის გადამღები ჯგუფის დაკავების გამო. ტელეკომპანიის მიერ გავრცელებული ინფორმაციით, გადამღები ჯგუფის წევრები ბელა ზაქაიძე, ვახტანგ ლეკიაშვილი და მიხეილ მიხოევი კონფლიქტის ზონაში რუსმა სამხედროებმა დააკავეს. ისინი სოფელ აძვში საზღვრის გადმოწევის ფაქტის გასაშუქებლად იმყოფებოდნენ. ჟურნალისტური ეთიკის ქარტია მიმართავს სახელმწიფო უწყებებსა და საერთაშორისო ორგანიზაციებს, იზრუნონ ტელეკომპანიის წარმომადგენლების დაუყოვნებლივ გათავისუფლებაზე, ქარტია ასევე მიმართავს ცხინვალში მომუშავე კოლეგებს, დაინტერესდნენ შექმნილი ვითარებით”, - ნათქვამია ჟურნალისტური ეთიკის ქარტიის მიერ გავრცელებულ განცხადებაში.

ტვ 3-ის ჟურნალისტები ოკუპანტებმა სოფელ აძვში დღეს დააკავეს. არსებული ინფორმაციით, რუსმა ე.წ. მშვიდობისმყოფელებმა მედიის წარმომადგენლები სოფელ არცევში რუსულ ბაზაზე გადაიყვანეს.