გოგა ხაინდრავა - მგზავრებს ლილოს ბაზრობის კოშმარს ასმენინებენ

საზოგადოება - 15:24, 14 Apr, 2014

1992

გოგა ხაინდრავა „ალისთან“ საუბარში შალვა ობგაიძის განცხადებას ეხმაურება.

„შალვა ობგაიძე აქამდე თუ მარშუტკებით დადიოდა, ერთი იკითხოს რა, ვისი გემოვნება განაპირობებდა, რასაც უსმენდნენ სამარშუტო ტაქსებში? სასირცხვილო ის არის, რაც იქ ხდება, ძალადობა მგზავრებზე, ასმენინებენ კოშმარს, ლილოს ბაზრობის მუსიკას დილიდან საღამომდე. ერთ-ერთმა კრეატიულმა ჯგუფმა თუ გოგა ხაინდრავას ხელმძღვანელობით კაი რადიო გააკეთა, რომელსაც მგზავრები მოუსმენენ, სადაც გემოვნებას იქნება, განათლებაც და ინფორმაციას, ეს სირცხვილია?! თუ ეს შალვა ობგაიძეს ესირცხვილება, შერცხვეს! “ - ამბობს ხაინდრავა „ალიასთან“ საუბრისას.

მისი განმარტებით, სამარშუტო ტაქსებში სპეციალურად დაარსებულ რადიო მაუწყებლის ფუნქციონირება, მონოპოლიას არ ნიშნავს.

„რა მონოპოლია ხდება ამიხსენით. მერე რა ავტობუსში სხვა რადიოა, მეტროში სხვა, მთაწმინდის პარკში სხვა, „სმარტში“ სხვა რადიო. გვაქვს თუ არა უფლება მგზავრებს კომფორტულად მოვემსახუროთ? კომპანიას აქვს ამის უფლება? ეს ხდება მგზავრების საკეთილდღეოდ“, - განაცხადა გოგა ხაინდრავამ.

„დემოკრატიული მოძრაობის“ წევრი შალვა ობგაიძე სამარშუტო ტაქსებში სპეციალურად დაარსებულ რადიო მაუწყებლის ფუნქციონირებას სოციალურ ქსელში გამოეხმაურა.

„იქნებ მძღოლებს რეპერტუარიც დაუმტკიცონ, რისი მოსმენის უფლებაც აქვთ. ეს მინიმუმ სირცხვილი“, - წერს ობგაიძე.

გოგა ხაინდრავასა და "თბილისის მიკროავტუბუსს" შორის გაფორმებული ურთიერთგაგების მემორანდუმი, მიკროავტუბუსებში, სპეციალურად დაარსებულ რადიო მაუწყებლის ფუნქციონირებას ითვალისწინებს. ახალ რადიო FM MA -ზე იქნება სხვადასხვა ტიპის გადაცემა, საინფორმაციო, საგანმანათლებლო. იქნება სხვადასხვა რუბრიკა, გათამაშებები და ვიქტორინები.

ნინო დათაშვილი