დღეს სოფლის მეურნეობის მინისტრმა შალვა ფიფიამ და ეკონომიკის მინისტრის მოადგილემ დიმიტრი ქუმსიშვილმა თანამშრომლებთან ერთად კასპის მუნიციპალიტეტეში 600-ზე მეტი ხის ნერგი დარგეს.

კამპანია „მწვანე მომავალი“ საქართველოს პრემიერ-მინისტრის ინიციატივით ხორციელდება. პროექტი საქართველოს მთელ ტერიტორიაზე ხორციელდება.

„მწვანე მომავლის“ ფარგლებში შემუშავდება „გამწვანების რუკა“, რაც გულისხმობს გასამწვანებელი ადგილების აღწერილობას. გარემოს დაცვის სამინისტროს სატყეო დეპარტამენტის მეშვეობით მოხდება ტერიტორიების იდენტიფიცირება, ნაკვეთებად დაყოფა და ნერგების მობილიზება. გათვალისწინებულია გადაშენების პირას მყოფი ჯიშების ნერგთა გამოყვანა სანერგე მეურნეობებში და შესაბამის ადგილებზე გამწვანების ზოლში მათი გამრავლება.

„პრემიერის ინიციატივას, ვიზრუნოთ გარემოზე, სოფლის მეურნეობის სამინისტრო აქტიურად უჭერს მხარს და გამწვანების დღევანდელი აქციით პროგრამაში „მწვანე მომავალი“ ერთვება. დღეს ამ ტერიტორიაზე სოფლის მეურნეობისა და ეკონომიკის სამინისტროს თანამშრომლები ერთობლივად 600-მდე ფიჭვის, იფანის და მუხის ნერგს დარგავენ. გარემოს დაბინძურება, მწვანე ნარგავების განადგურება დღეს მსოფლიო მასშტაბის პრობლემაა. სამწუხაროდ, არც ჩვენი ქვეყანაა გამონაკლისი. წლების განმავლობაში უკონტროლოდ იჩეხებოდა ტყე, რაც ქვეყნის ეკოლოგიისთვის დამღუპველი პროცესია. საქართველოს მასშტაბით გაზაფხულის სეზონზე დაახლოებით სამასი ათასი ნერგი დაირგვება; ერთობლივი ძალისხმევით, ჩვენ შევძლებთ აღვადგინოთ გაჩანაგებული ტყეები და ხელი შევუწყოთ ეკოლოგიური მდგომარეობის გაუმჯობესებას“ - განაცხადა შალვა ფიფიამ.

აქციის ფარგლებში მიმდინარე წელს 500 000 ხის დარგვაა დაგეგმილი.