მცხეთის დამისამართება დაიწყო

საზოგადოება - 14:31, 11 Apr, 2014

1011

ქალაქ მცხეთის დამისამართება დაიწყო. ამის შესახებ ინფორმაციას საჯარო რეესტრის ეროვნული სააგენტო ავრცელებს.
სააგენტოს თავმჯდომარის მოადგილე ალექსანდრე თევდორაძე და სერვისების განვითარების სააგენტოს თავმჯდომარე იოსებ ბაღათურია, ქალაქ მცხეთაში, დამისამართების პროცესის მიმდინარეობას ადგილზე გაეცნენ.
ამ ეტაპზე ქალაქ მცხეთაში ქუჩებისა და მათი დასახელებების, გზების პარამეტრებისა და საგზაო ნიშნების აღწერა–ინვენტარიზაცია მთლიანად დასრულებულია. სრულად არის აღწერილი 1000-მდე, ხოლო აღსაწერია 4000-მდე სამისამართო ერთეული.
მცხეთის რაიონში მისამართების აღწერა-ინვენტარიზაციის საველე სამუშაოებს საჯარო რეესტრის მობილური ჯგუფები ასრულებენ. საჯარო რეესტრი, ინვენტარიზაციის შემდეგ, ქუჩების, მათზე არსებული შენობა-ნაგებობებისა და ბინების დანომვრას განახორციელებს. "დამისამართების პროექტი ქვეყნის მასშტაბით სამისამართო სისტემის სრულყოფას და განვითარებას შეუწყობს ხელს. სამისამართო რეესტრის მოწესრიგების შემდეგ, მოქალაქეებს უძრავი ქონების რეგისტრაციის პროცედურები მნიშვნელოვნად გაუმარტივებათ, დასახლებულ პუნქტებში უსახელო გზები და ქუჩები აღარ იარსებებს, ხოლო კონკრეტული მისამართები მარტივად მისაგნები იქნება", - აღნიშნა საჯარო რეესტრის ეროვნული სააგენტოს თავმჯდომარის მოადგილემ ალექსანდრე თევდორაძემ.
სერვისების განვითარების სააგენტოს თავმჯდომარის, იოსებ ბაღათურიას განცხადებით, მას შემდეგ, რაც საჯარო რეესტრის ეროვნული სააგენტო დაასრულებს ინვენტარიზაციის პროცესს, სერვისების განვითარების სააგენტო ახალ მისამართებზე არსებულ საცხოვრებლებში რეგისტრირებულ პირთა იდენტიფიცირებას მოახდენს, რაც მჭიდრო კავშირშია დაზუსტებული, მუდმივად განახლებადი, საიმედო საარჩევნო სიის ფორმირებასთან.
დამისამართების ერთიანი სისტემის ფარგლებში, შენობა–ნაგებობებს და სხვა ფართებს მიენიჭება ნუმერაცია, მომზადდება ქუჩის სახელდებისათვის და ნუმერაციისათვის საჭირო სამისამართო პროექტები, რომლებიც განსახილველად გადაეგზავნება მცხეთის რაიონის მუნიციპალიტეტს. შეიქმნება ერთიანი გზათა ქსელი, რაც ერთ–ერთი საფუძველი გახდება ქვეყანაში სანავიგაციო სისტემის ამოქმედებისათვის.
მცხეთის მუნიციპალიტეტში არასწორი, არასრული და ნუმერაციის არმქონე მისამართების კორექტირება 2014 წლის სექტემბრამდე დასრულდება.