ნიკოლოზ რაჭველმა შეიძლება საქართველო დატოვოს

საზოგადოება - 10:26, 11 Apr, 2014

4030

„ყველანაირად ცდილობენ მაიძულონ მივიღო რადიკალური გადაწყვეტილება, სადაც მაქვს არჩევანი ორ ვარიანტს შორის: ან საქართველოს დატოვება ან უკომპრომისო ბრძოლა მათი უმეცრების, არაპროფესიონალიზმის და ბოროტების წინააღმდეგ“! - წერს ნიკოლოზ რაჭველი საკუთარ ფეისბუკის გვერდზე. კომპოზიტორი ამ სიტყვებით დავით მაღრაძის განცხადებას ეხმაურება. კულტურის ყოფილი მინისტრის თქმით ქვეყანაში, კულტურის სფეროში საქმის ორგანიზება ხარვეზებით მიმდინარეობს და კულტურის სამინისტროში მაღალი კვალიფიკაციის ხალხს სრული დილეტანტებით ანაცვლებენ, რომლებიც დილეტანტურ გადაწყვეტილებებს იღებენ...
ნიკოლოზ რაჭველი: „როგორც თბილისიდან მატყობინებენ სწორედ კულტურის სამინისტროს რეალურ მმართველს (ვისაც დათო მაღრაძე გულისხმობს თავის განცხადებაში) დღემდე არ მოუწერია ხელი ჩემთვისა და ჩვენი მუსიკალური ცენტრისათვის სასიცოცხლოდ მნიშვნელოვან დოკუმენტზე, რომელსაც დეკემბრიდან ველოდებით, რომელზეც მნიშვნელოვნადაა დამოკიდებული საქართველოს ეროვნული სიმფონიური ორკესტრისა და საგუნდო კაპელის ბედი!!! ძალიან ვცდილობ დავიცვა ტაქტი და ისედაც მრავალი უარყოფითი ემოციით დამუხტულ ჩემს საყვარელ ხალხს არ მოვახვიო თავს კულტურის სამინისტროს ქმედებებიდან გამომდინარე ჩემი სასოწარკვეთილება, მაგრამ ყველაფერს ხომ აქვს საზღვარი?!
ყველანაირად ცდილობენ მაიძულონ მივიღო რადიკალური გადაწყვეტილება, სადაც მაქვს არჩევანი ორ ვარიანტს შორის: ან საქართველოს დატოვება ან უკომპრომისო ბრძოლა მათი უმეცრების, არაპროფესიონალიზმის და ბოროტების წინააღმდეგ! ამ არჩევანის ზღვარზე ვარ... სამწუხაროდ...
ნიკოლოზ რაჭველის ამ განცხადებას უამრავი ადამიანი გამოეხმაურა, მათ შორის უცხოეთში მოღვაწე ქართველი ალტისტი გიორგი ცაგარელიც.
გიორგი ცაგარელი: „ეგ იმის ბრალია, რომ კაბინეტებსა და სამზარეულოებში რჩებოდა მათი ამაზრზენი საქცილები, ტყუილები, კაბინეტებში ნასვამ მდგომარეობაში გინებები (მარგიშვილს ვგულისხმობ), ბადრი გრუზინსკის ინტერვიუებში შანტაჟები და ბერიკაშვილის თავგამოშტერებულობა!!! ამ ყველაფრის და არა მარტო ამის გადაყლაპვამ უარესი შედეგი მოიტანა და ეხლა ისე გაიდგეს ფესვები, რომ მათთან ბრძოლა ძალიან რთული იქნება,თუმცა მშიშრები და მხდლები არიან რადგან სიმართლე მათ მხარეს არასდროს ყოფილა და ამიტომ აქციები! აქციები და კიდევ ერთხელ აქციები!!! მათთან დიპლომატია და ნორმალური დიალოგი არ გამოდის, რადგან რევანშისტულ-დაბოღმილ მდგომარეობაში ათას სიბოროტით ეპყრობიან ყველას! და ის ვერ გაათვითცნობიერეს, რომ მენეჯერებად უნდა ედგნენ ხელოვანებს გვერდში და არა პრიქით შანტაჟში და ტყუილებში!!! ერთხელ მაინც ვინმე სამინისტროდან დაინტერესდა და ნახა რა მდგომარეობაშია ქვეყნის უმთავრესი მუსიკალური ცენტრი???
ნიკოლოზ რაჭველის საქართველოდან წასვლას ბევრი აპროტესტებს. „ბრძოლა, ბრძოლა და ბრძოლა! ჩვენ მხარში ამოგიდგებით, დაგვიძახე, - ამ სიტყვებით ამხნევებენ მას.
„კატასტროფაა ის, რომ ხელოვანი ადამიანების ბედი დამოკიდებულია ვიღაც გაუნათლებელ არაადეკვატურ პოლიტიკოსებზე,რომლებსაც წარმოდგენა არ აქვთ რამდენად მნიშვნელოვანია ნიკა რაჭველი საქართველოსთვის, რომლებიც მუდმივარ გაუაზრებლად გაიძახიან იმას, რომ საქართველოსთვის უნდა იბრძოლონ, საინტერესოა როგორ უნდა იბრძოლონ როცა იმ მინიმალურ დახმარებას არ უწევენ ადამიანებს, რომლებიც თავისი მუსიკით ქმნიან ისტორიას. ძალიან არ მინდა,რომ აქედან წახვიდეთ,მაგრამ ყოველთვის დარწმუნებული ვიყავი და ახლაც დარწმუნებული ვარ, რომ საზღვარგარეთ უზომოდ დაფასებული და წარმატებული იქნებით. თუმცა მაინც ჯობია, რომ არ წახვიდეთ“- წერს ერთ-ერთი გულშემატკივარი თავის კომენტარში.