ბიზნესმენ ვანო ჩხარტიშვილს წინა ხელისუფლების მიერ ჩამორთმეული ქონება, მთავრობის გადაწყვეტილებით 1 ლარად უკან დაუბრუნდა. ქონების ბიზნესმენისათვის გადაცემა 2014 წლის 4 აპრილის N616 განკარგულებით გაფორმდა.

მთავრობის განკარგულების მიხედვით, 1 ლარად გადაცემული ქონება – სიღნაღში, პირდაპირი მიყიდვის წესით ეკა ბეჟანიშვილის ქუჩაზე მდებარე 35 000 კვ.მეტრი არასასოფლო სამეურნეო დანიშნულების მიწის ნაკვეთი და მასზე განთავსებული შენობა – ნაგებობები „სომგოს კომპანიას“ ეკუთვნის. "კომერსანტმა" გაარკვია, რომ ეს კომპანია ვანო ჩხარტიშვილის კომპანიაა.

„სომგოს კომპანის“ 90% წილი ოფშორულ ზონაში დარეგისტრირებულ ორ საწარმოს, ”სონატა ალიანსს” (სეიშელის კუნძულები) და ”გოსია ფაინენსინგს” (პანამა) ეკუთვნის.

როგორც ჩხარტიშვილმა განაცხადა, სიღნაღში არსებული 3.5 ჰექტარი არასასასოფლო სამეურნეო დანიშნულების მიწის ნაკვეთი მან 2007 წელს სახელმწიფოსაგან აუქციონის გზით, 1 მილიონ დოლარად შეიძინა, მისი ემიგრაციაში წასვლის შემდეგ კი, ეს ქონება წინა ხელისუფლებამ ჩამოართვა.

„სომგოს კომპანიაში“ აცხადებენ, რომ ახალ ხელისუფლებას სიღნაღში არსებული მიწის ნაკვეთი ეკონომიკის სამინისტროს ბალანსზე დახვდა. 2014 წლის დასაწყისში, ვანო ჩხარტიშვლმა განცხადებით მიმართა ეკონომიკის სამინისტროს და მოითხოვა კუთვნილი მიწის ნაკვეთის დაბრუნება.

ეკონომიკის სამინისტრომ დააკმაყოფილა ჩხარტიშვილის მოთხოვნა და გარიგება შედგა, რომ კომპანია ქონების დაბრუნების სანაცვლოდ, სიღნაღის პროექტში დამატებით 2 მილიონი ლარის ინვესტიციას განახორციელებდა.

როგორც კომპანიაში აცხადებენ, ეკონომიკის სამინისტროს წინაშე აღებული ვალდებულებით 3.5 ჰექტარზე ღვინისა და ალკოჰოლური სასმელების საწარმო აშენდება, ასევე ერთ ჰექტარ მიწის ნაკვეთზე სადემონსტრაციო ვენახის გაშენებასა და 50 ნომრიანი სასტუმროსა და 200 კაციანი რესტორნის აშენებას გულისხმობს.

კომპანიის მენეჯმენტის თქმით, სავალდებულო ინვესტიციის ოდენობა 2 მილიონი ლარით განისაზღვრა, აღნიშნულ საკითხზე ზეპირ შეთანხმებას ხელი უახლოეს დღეებში მოეწერება.

წყარო: "კომერსანტი"