საქართველოს შინაგან საქმეთა სამინისტროს მომსახურების სააგენტოს დელეგაცია ახლადგაწევრიანებული ქვეყნის სტატუსით ირლანდიის ქალაქ დუბლინში, 5-6 ივნისს მძღოლთა ტესტირების საერთაშორისო კომიტეტის (CIECA) 46-ე გენერალურ ასამბლეას დაესწრება, რომელიც მართვის მოწმობის თეორიული და პრაქტიკული გამოცდების ტექნოლოგიებს ეძღვნება. ასამბლეაში მსოფლიოს 36 ქვეყანა მონაწილეობს. აღნიშნულ ღონისძიებაზე იგეგმება კომიტეტის წევრი ქვეყნებისთვის ქართული მხარის გაცნობა, სააგენტოს წარმომადგენლების სიტყვით გამოსვლა და შსს-ს მომსახურების სააგენტოში განხორციელებული და მიმდინარე პროექტების პრეზენტაცია.

მძღოლთა ტესტირების საერთაშორისო კომიტეტი 1956 წლიდან ფუნქციონირებს და საგზაო უსაფრთხოებასა და ავტომობილის მართვის სტანდარტების კონტროლის სფეროში წამყვან ორგანიზაციას წარმოადგენს. CIECA-ს მუშაობის ძირითად მიმართულებებს წარმოადგენს: საგზაო უსაფრთხოების სტანდარტების დაცვა და მოქალაქეებისთვის ცნობიერების ამაღლება, საგზაო მოძრაობის გამარტივება და უსაფრთხოებაზე ზრუნვა, ავტომობილის მართვის ტექნიკის გაუმჯობესება და მართვის მოწმობის პრაქტიკული ნაწილის გამომცდელთა თანამედროვე სტანდარტებით გადამზადება. აღნიშნულ საკითხებზე კომიტეტში გაერთიანებულ ქვეყნებს შორის მუდმივად მიმდინარეობს ინფორმაციის და გამოცდილების გაზიარება.