სანიკიძე: გენისპექციის დასკვნა, რის გამოც სკოლის დირექტორი თანამდებობიდან გათავისუფლდა, პროკურატურაშია გადაგზავნილი

საზოგადოება - 15:00, 09 Apr, 2014

1781

საქართველოს განათლებისა და მეცნიერების მინისტრის თამარ სანიკიძის განცხადებით, გენისპექციის დასკვნა, რის გამოც 53-ე სკოლის დირექტორი მარინა რამინაშვილი თანამდებობიდან გათავისუფლდა, პროკურატურაშია გადაგზავნილი.

მინისტრის განცხადებით, დასკვნა დანაშაულის ნიშნებს შეიცავდა და უწყებაში მისი გადაგზავნა სწორედ ამის გამო მოხდა.

"არავის აქვს უფლება სკოლა გამოიყენოს პირადი მიზნებისთვის, თითოეული ჩვენგანი, არა მარტო დირექტორი, პასუხისმგებელია ყველა ლარის მიზნობრივად დახარჯვაზე, რომელიც მოდის ბიუჯეტიდან არის ხალხის ფული და რომელიც უნდა მოხმარდეს სკოლას და მოსწავლეს. გაფლანგული თანხების და ზარალის დაანგარიშება არის სხვა უწყების კომპეტენცია. რადგან დასკვნა შეიცავდა დანაშაულის ელემენტებს, ის გადაეგზავნა პროკურატურას", - განაცხადა თამარ სანიკიძემ.

მინისტრი, ყველას ვინც 53-ე სკოლის დირექტორის გათავისუფლების თაობაზე მის გადაწყვეტილებას არ ეთანხმება, ურჩევს სასამართლოს მიმართოს.

"ვერ ვხვდები როგორ უნდა მოხდეს გადაწყვეტილების შეცვლა, როცა თითოეული ფაქტი დადასტურებულია. თუკი ვინმე რაიმეს არ ეთანხმება, ამისთვის არსებობს სასამართლოს გზა, მხოლოდ ამ შემთხვევაში შეიძლება გადაწყვეტილების შეცვლა", - განაცხადა სანიკიძემ.

ნინა შადური